Maham ka UHM ïa ki kynthei Khasi, kiba ïada ia u khar poiei

Shillong:Ka United Hynñiewtrep Movement Central Executive Council hynne ka sngi ha ka jingïalang ba lah pynlong ha ophis treikam ka seng, ha Law U Sib ha ka por 4:30 Nohphai sngi ka lah ïoh ban pdiang burom ïa ki arngut ki dkhot ba wan pynïasoh bad ka seng, U Samla Rangbah uba lah long teng u Nongïalam ba rim jong ka MIPF Samla Donbok AV Khongsit bad kumjuh ruh u Samla Freddy Kurbah uba dei u Nongïalam jong ka seng kiba dei peit ïa ki nongbylla sngi, ka KJLU.

Ha kane ka sngi lah ïoh ïa ki jingkren bad ki jingangnud jong kine ki samla Rangbah ba ka jing wan pynïasoh ka jongki bad ka UHM ka dei ha kiba bun ki nongrim.
Kumta kum ka seng hi baroh kawei khlem da thew ïano ïano ruh ka pdiang sngewbha ban wan rung bad ka seng UHM khnang ban dang lah ban shakri khambha shuh shuh ïa ka jaitbynriew.

La pynïaid ïa ka jingïalang da U President Rangbah ka seng Bah Charlie J Rani bad lah ïoh ruh ban pyntian smai ïa kine da u Vice President ka seng, u Samla Kenneth Jana bad lah ïoh ruh ki kyntien sneng tien kraw naduh u General Secretary ka Seng Bah Teibor Shadap, Joint Secretary ka seng Samla Shepherd Kharsahnoh bad kumjuh ruh na ka liang u Socio and Cultural Secretary ka seng Bah Wellborn Mawkhlieng, bad u Organising Secretary Bah Kharlesbon Nongbri.

Ha kane ka sngi ka seng ruh ka lah shim ïa ka rai ban leit ïakynduh ïa u Symbud Myntri Rangbah ka Sorkar Jylla, ban ïakren halor kiba bun ki mat ki jura ba ka seng hi ka lah kwah ban ïakren bad kane ka Sorkar MDA2 bad ha kajuh ka por ka seng ka sngew ban pynrem jur ïa kito ki kynthei ba mihkhmat namar u mynder shi sngi hadien ka jingleit khynra jong ka KHADC ïa ki dukan ba shong beaiñ ha shi lynter jong ka surok GS road naduh Motphran ter ter haduh Umsohsun, bad ka maham ruh ïa kito ki kynthei ba mihkhmat ba kim dei ban mih bad ïada ïa u khar poi ei tang na ka bynta ka malade ka jong ki.
Kyntang ïawai ka seng hi baroh kawei ka angnud bad ha kajuh ka por kan sa leit ïakynduh ïa u Paiem ka Hima Mylliem bad kumjuh ruh ïa U CEM ka KHADC ban ïakren bad ïa phylliew jingmut halor kiba bun ki mat kiba ïadei bad kiba tyngkhuh bad ka jaitbynriew, ong u President Rangbah ka seng Bah Charlie J Rani.