Shillong:U CEM ka KHA DC u Bah Pynïaid Sing Syiem, u la pyn paw ïa ka jingbitar, hadien ba u la lap da la ki jong ki khmat ba ki bar jylla, kiba wan naei naei ki dang ïoh ban khaïi laitluid hapoh ki thaiñ ïew Mawlong bad kumjuh ruh ki thaiñ ka Bimola.
Ha kane ka jinglap ïa ki bar jylla, kiba dang die jingdie hapoh ki rud surok jong ka Ïew Mawlong u la ther tyngeh bad u da bthah ruh mardor ïa ki Pulit Enforcement ka KHADC bad ki bor pynïaid district ba la wan synran lang, ki Sector Officer napoh SP Office ba ki dei ban leh eiei ïa kine kiba wan khaïi beaiñ.
Katba hapoh ki thaiñ Bimola pat u la lap ba ha ki jaka badie juti madan la don ki bar jylla, kiba la khaïi beaiñ, hynrei ym da ki Khasi.
“Ka long kaei kaei kaba pyndom, haba ïohi ba don pynban da ki dkhar ñiuhmoh kiba die juti ha kane ka thaiñ Bimola bad nga la ai hukum ïa u Superintendent of Police ka Enforcement ka KHADC, u Bah A Lanong ban phah weng beit ïa baroh namar la lap ruh ba ki wan khaïi khlem trading license ne ka laisen khaïi bad nga kren beit da kaba shai ba lada don ki Kynthei Khasi kiba kam trai ïa ki mar ne tiar ba ki die ki dei ban wan ai jingpynshai sha KHADC, ym ban pynshai ha kane ka jaka ba la leh ki kam khaïi,” ong u CEM haba ïakren bad ki lad pathai khubor.
Ha kane ka jingjurip kaba kynsan, khamtam ha ka thaiñ Bimola, la lap ba la don ruh katto katne ngut na ki thei Khasi kiba la wan mareh ban kam trai ïa ka jaka die bad ïa ki tiar bad ki die, hynrei na ka liang u CEM u la kren beit da kaba shai ba ki dei ban wan pynshai sha KHADC, lada don ki kynthei Khasi kiba kam trai ïa ki mar ne ki tiar ba ki die ha kitei ki jaka.
Katba ha ka jingleit jurip sha ki thaiñ Ïew Mawlong, na ka liang u CEM ha ryngkatlang ka jingsynran ka EM Market ka Kong Grace Mary Kharpuri bad u Bah Carness Sohshang EM Development, haba ïohi ba ki don tang ki Khasi kiba shong ha ki jaka ba ju die shana ki bar jylla, mynshwa, ki la sngew kmen hynrei ki ïai kylli pat ïa ki jinglong trai jong ki.
“Kan long ka bym shngaiñ shuh mynta naba la bun palat ki nongkhaïi kiba nabar jylla bad kane kan long ka jingma ruh namar ngim tip shano ki sah, naei ki wan bad ki jinglong jong ki, kiba kumno bad lada ki leh kano kano ka kam ba sniew shano ngin leit kem ne leit wad ïa ki, kumta ym dei ban ai lad satia bad lada ki wan wad laisen khaïi na KHADC na ka bynta jong ki kan ym long kaba suk ba kin ïoh mardor,” pynkut u CEM ka KHADC.
La ïohi ruh ba ki bar jylla kiba khaïi ha ki thaiñ Ïew Mawlong bad kiwei ki jaka ki la hap ban lum kyrkieh ïa ki mar khaïi jong ki hadien ba ki la shah hukum ha ki pulit ban leh ïa katei ka kam.
Shkyeh u Pyniaid singh