Dawa tang ban weng nongtrei bad ban nym iathied dewbilat Topcem

Hadien, ka jingialang paidbah, kaba la long ha ka 24tarik Nailar 2023, ki la mih shibun ki seng, kiba buh ia ar tylli ki jingdawa bad kitei ki long (i) weng ia arngut ki nongtrei kiba pynshit bad kiba tim sim paidbah bad (ii) ban sangeh noh, ka jingdie ia katei ka dewbilat ha ki dukan bapher, ha kylleng ka Ri Khasi Jaintia.

Haba shu kren najrong, la sngew kumba kitei ki jingdawa, ki dei kiba sngew iahap shibun eh; hynrei ngi hap ban kynmaw, ba kitei ki jingjia, ki dei, na ka jingleh khnang hi jong katei ka kompeni topcem, ha ka jingiasylla bad ki bor District lem bad ka tnat Pollution Board bad ka daw, ka long, ba balei ki leit pynlong ia ka jing ialang paidbah ha phyllaw jong katei ka kompeni bad katei kam dei ka jingialang paidbah, hynrei, ka kylla long noh, ka jingialang jong katei hi ka kompeni bad balei ba ki khang ia ki riew paidbah, kiba mut ban leit shim bynta ha katei ka jingialang bad katei ka dei ka jingmut kaba sniew bad ba kim kwah ban don ba ujor, ia ka jingthmu jongki bad kumta, ba kin lah ban khlong katba ki mon, ia u mawshun na Thangskai.

Kitei ki ar tylli ki mat, kiba ki seng bapher, ki iakhih, ki long, ki bym don jingktah eiei ruh em, ia ka top cem, namar ba kam don jingeh ban beh ia kitei ki nongtrei na Shillong bad pynsah ia ki, ha Guwahati, kaba ju dei hi, ka nongbah jong katei ka kompeni bad kam don jingwit, lada ym don ba thied dewbilat ha Ri Khasi Jaintia ruh, namar kaba bun hi, ka leit sha Assam bad kylleng ka thain shatei lam mihngi.
Mynta katei ka kompeni (lem bad kiwei ruh), ki la tip ia ka buit bad nangne shakhmat, kin iaid beit da katei ka rukom pynlong jingialang paidbah, da kaba iasylla bad ki bor District, bad kin shu nion da ka bor bad kin shu bom ia kiba leit ban ujor pyrshah bad kin ia mynjur hi para ma ki.

Lada ki sengbhalang lane ki kynhun bapher, ki sngew pyrshah, ki dei ban pyrshah nyngkong, ia ka rukom pynlong ia ka jingialang, namar ba ka dei kaba la leh shiliang khmat lypa bad kaba long beain ruh, namar ba katei kam dei satia ka jingialang paidbah, hynrei, ka dei ka jingkhot sngewbha, tang ia kito kiba kyrshan, ia ka topcem, ba kan ioh ban khlong maw shuh shibun bad kaba ngi hap ban shai bha, ka long, ba kat ka jingkhlong maw kaba 4500 ton ha ka shisngi, hynrei lada ym don shuh, tang uwei ruh, uba kwah ban iakren ne ia phylliew jingmut, ia ka bha bad kaba sniew, kumta katei ka pyni ba ka jing iatip lem jong katei ka thain, ka lah iap bad ha kaba iadei bad kitei ki nongpynshit; ka jingkylli, ka long, la ki pulit, ki la kem ne em ia ki, lane ioh lehse, ki la leit phai bad shong jahthait pynban sha la iing, hadien ba ki la pyndep, ia la ka jong ka kamram; namar ba kat haduh mynta, ngim pat iohsngew la ki arngut, ki nongpynshit, ki la poi ne em sha along ki pulit.