Ai khublei u Conrad ïa u Modi, ba ithuh ïa u Bah Brian

Shillong:U Myntri Rangbah ka Jylla Conrad K Sangma, ula ai khublei ïa u Myntri Rangbah Duh ka Ri u Narendra Modi, halor ka jingai jingithuh ïa ki synniang jong u Bah Brian Daly Kharpran, lyngba ka kam ban wad bniah shaphang ki krem ba don hapoh ka Jylla.

Haba thoh hapoh ka X (mynshwa ka twitter), u Conrad ula ong, “Khublei shibun ïa phi, Myntri Rangbah Duh ka Ri Narendra Modi ba ai jingithuh ïa ki synniang u Bah Brian Daly Kharpran lyngba ka kam wad bniah shaphang ki krem. U Bah Brian u dei u nongwad bniah ïa ki krem ba nyngkong eh ka Jylla Meghalaya ba la pawnam bad ha ryngkat bad ka kynhun jong u, ka Meghalaya Adventurers’ Association kila ïarap ïa ki nongrung krem bad nongwad jingtip shaphang ki krem kiba wan na kylleng ki Ri ka Pyrthei”.