DA PYNSHONGNIA

P.B.S
[ba bteng] “Im biej me i mei ka dei namar ba i ieit ia nga bad im pat kwah ba ngan long kum ma me” pynphai ktien u Pher
“Nga ong dei namar ba kane ruh ka dei ka kam bad ka pynimja ia kiba bun” pynshai bha uta u patralok
“To to lah biang me ia ngin ia lehkai noh” ong u Pher
“Ia kein” mynjur uta u patalok.

“Mei nga la iathuh ia uto u khynnah ba phim shah” ong u Pher ha la ka kmie
“Biang kein ba yn nym pain shuh” ong ka kmie u Pher
“Me da kynmaw da iawer leit jingleit ne pain kam mano mano da kylli shwa na nga” ong ka kmie bad ka da peit pynheh ki khmat kum ban pyntieng
“Hooid, nga sngewthuh mei” kohnguh khlieh u Pher
“La i jynjar shisha ban peit ia kane ka juk mynta ha kaba ka jingbha i kumba ym don jaka shuh. La shu ker sawdong tang da kiei kiei ki bym tei shuh ia ka imlang sahlang. Dang khynnah ma ngi 40 ne 50 snem mynshwa ka dang pher shibun. Mynta te tang tiak la ngat ha ka jingsniew ba bun syrtap. Tang iwei ar eh lah ban shem ia ki lok ba lah ban shaniah” kren bynniaw ka kmie ha khmat ki khun.

“Ym lah leh ei ei shuh phi mei ka shong ha ka shimet shimet mynta te. Lada phi khnium ia kata ki briew kin nym sngew tynnad namar ka dei ka pyrthei ia beh mangkarong la ka dei kano kano ka bynta” ong u khun heh
“Ia kata te nga hap kren hi kein namar ba ka da pher shisha. Lada ngam iathuh me me tip hi ia ka mynnor” pynphai ktien ka kmie
“Kam myntoi phin thnum namar mynta wat ka Tv ruh ym don ba peit shuh. Mynshwa ha ka por jong phi pat khapngiah ka kamta. Kata kein ka dei ka jingiapher” pynkynmaw u khun jong ka
“Lah sngewthuh ym lah leh ei ei hynrei hap shu pdiang beit hynrei ia phi khun nga kwah ban bsiap kato ka jingpyrkhat palei kum ha kito ki por” ong ka kmie
“Nga sngewthuh mei ba phi kwah bad angnud eh ba ngin sngewthuh ia lade ym ha kaba shad kynting ha ki lyer kynsha” ong u khun heh jong ka
“Baroh ngi donkam ia ka pisa wat uba riewspah ruh u dang thawlad shuh shuh ban ioh pisa katno tam ma ngi lei ki raitoi kiba shu bylla na kti ha shyntur. Ka kam kaba kwah trei u Deng ruh ka dei kaba biang tangba ban ioh pisa dang katto rta te ka buh ha ka jingpynshoi” ong ka kmie
“Phi i em mynta lei ka por tang shu ioh pisa la poi sha kaba sniew bad kaba shah teh mraw” ong u khun
“Ieh ynda kham heh un wad bylla kaba neh” ong ka kmie.

“U la kham sngewthuh hi kein mei kaei kaba dei bad kaei ka bym dei” ong biang u khun heh
“Lada ym sngewthuh hi ynda la heh la san te ka long noh kumba kwah hi. Tangba ha ka pnah ktien jongno-re-jongno wat uba lah sngewthuh eh ruh kum liat hi. Shu kyrmen beit ba kaba ka wan lyngba ka jingiaisneng iai kyntu ba kan nym sepei shisien ka sngi” kren pynkut ka kmie
LYNNONG – 6
Hadien ka jingiakren bad la ka kmie u Peter u la pdiang beit ba u bah Bok yn pynthied kali ia u. Haba u la leit trei shi taiew bad dei ha ka sngi kut taiew (sngi saitjain) ba u Peter u la iakynduh khnang bad u malik jong u ban iakren pynthikna ia kaei kaba u pynpaw mynshwa
“Bah, nga kwah ban iakren ei ei bad phi halor kato ka jingtyrwa sbun mynsiem jong phi” ong u Peter da ka sur kaba jem
“Oh… phi mut ia kato ka kali?” ong u bah Bok
“Hooid bah” la jubab u Peter
“Te phi la iashim rai kumno bad la i mei?” kylli u malik
“I mei bad nga ngi pdiang sngewbha ia kato ka jingmut babha jong phi bad ba phin shu khate khyndiat khyndiat na ka tulop bnai jong nga” ong u Peter.

“Me lah kaba rim ne kaba thymmai syndon” kylli kwah tip u malik
“Kaba rim te nga sngewthuh kam da slem than ka jingshah ot tulop hynrei kaba thymmai kan shim por slem, lehse da ki phew snem” pynpaw u Peter
“Hooid kata ka dei. Namar lada nga khate bun kumba Rs 5000/- ne Rs. 10,000/ kan ktah ia ka iing jong me hynrei kaba rim pat te lada ot tang Rs. 2000/- shi bnai ruh ka dang biang hi” pashat jingmut u malik
“To sa pyrshang phi ban pynwad da kaba dang kham thymmai ba kan kham neh. Phi ba bun paralok thikna phin ioh beit” ong u Peter
“To Peter wat khuslai than nga la sngewthuh hi ban pyrkhat kyrpang ia me bad khamtam eh ba me dei u khun paralok uba nga sngewtynnad palat. Ynda me la ioh kali me la kham suk bad nga ruh nga kham suk lada nga phah kit ei ei” kren ieit u malik
“Khublei shibun eh bah ia ki kyntien jong phi bad nga ruh ngan leit noh ba lah miet. Mynta la jan dap 6:30 pm” ong u Peter bad start noh ia ka scooty rim. [yn dang bteng]