Sa katto katne bnai, yn ioh kot kudi nar, na Sohrarim

Sohrarim:Sa tang katto katne bnai, ka lah ban shim por, ba ki briew jong ka Meghalaya kim donkam shuh ban thied Kot Kudi Nar (Drone) nabar, hynrei kin sa ioh na Sohrarim ha ka dor ruh kaba kham tad.
Une u Kot Kudi Nar un sa paw pyrthei shen na u samla Balamjingsuk Diengdoh uba la dep ban shna bad pynher tangba ym pat lah ban her jrong bad jngai namar ba dang donkam ban pynbha ban ioh ki tiar ba kham biang namar ba ym ioh na kane ka jylla.

U samla Balamjingsuk uba dang pule ha klas XI, u dei na shnong Sohrarim uba shah hikai ha ka Innovation Hub ia ki tiar ilektronik kumba 2 snem shiteng bad mynta u la nang ban shna hi ia u drone. “Nga la pyrshang ban shna ia u drone (kot Kudi Nar) haba kaba nyngkong, nga mut uba suk hynrei hadien u eh bha”, la ong u samla Balamjingsuk.
U la iathuh ba shwa ban shna, u peit nuksa na YouTube, Google ban shna ia u drone bad ki tiar ba donkam. U la iathuh ba naduh dang khynnah, u ju sngew jingmut jingpyrkhat ba ngan ioh niah eiei ha madan hynrei ynda la heh, nga sdang ban pyrkhat bad nga lap ka jingmut ba u kot Kudi Nar u dei ban iarap ia nga bad nga sa sdang ban shna”, u la ong.

“Nga shna ar bnai shiteng bad une u drone u la lah ban her tangba ym pat lah ban her jrong na sla khyndew bad sha jngai namar ba ki tiar ba kiba dang tlot”, la ong u samla Balamjingsuk.
Kawei ka jingeh ban pynher jngai ia une u kot kudi nar, ka dei namar bym pat ioh tiar ba hap ban phah nabar. “Lada ioh tiar ba kham khlain, u lah ban her 10km sha jrong bad 5 km ka jingjngai”, la ong shuh u samla Balamjingsuk.

Ban shna ia u kot Kudi Nar hap ban shna leh ia ka programming jong u Remote khnang ban sngewthuh ban pynher ia u. “Nga sngew ba lada biang ki tiar, nga la lah ban pyndep pura ban shna ia u kot Kudi Nar”, u la ong.
Une u samla u la ioh lad ban sei ia ka sap jong u lyngba ka jingprat lynti ka Smart Village Movement kaba la wanrah ia ki kompeni kiba iadei dur ha ka Sohrarim Nook kaba dei kum ka Youth Centre ban hikai ia ki samla halor ki sap ki phong bapher bapher jongki.

Katkum ka jingiathuh u samla Balamjingsuk ki jinglut ban shna ia u kot Kudi Nar kan poi 30 hajar shaneng eiei namar ba ki tiar ki long kiba kham rem bad ka dor lada die kan palat ia kane.
Ym tang u kot Kudi Nar hynrei u shna ruh ia ka Solar Tracker kaba bud ia ka jingmih haduh jingsep ka sngi.