Dangstep haba miet, ioh iatai ki MLA Bhoi bad ka Myntri sorkar halor ka jingdonkam ki paidbah ha Ri Bhoi

Nongpoh: Mynhynnin ka sngi ka la don ka jingialang kaba kyrpang ne ka (Review Meeting) hapdeng ka Kong Ampareen Lyngdoh, Myntri ka sorkar jylla lem bad ki 5 ngut ki MLA na Ri Bhoi, kata na ka bynta ban iakren halor shibun ki kam pynroi ha ki liang bapher bapher ha Ri Bhoi.

Katei ka jingialang ka la sdang naduh ka por 10 baje eiei mynstep bad kaba la kut haduh ka por 7 baje janmiet, ha kaba lyngba katei ka jingialang, ka la don ka jingiakren bad iatai sanai bha hapeng ki 5 ngut ki MLA, u DC Ri Bhoi lem bad ki Doktor lem bad ophisar na ki tnat sorkar bapher bapher.
Ki mat jingiakren kiba kham kongsan eh ha katei ka jingialang, ka long halor ka koit ka khiah lem bad ka jingthmu ban nangkyntiew shuh shuh ia ki kam rep ha Ri Bhoi, khnang ba kan long kaba ai jingmyntoi ia ki nongrep hapoh ka Distrik.

Haba iadei bad ka koit ka khiah, lyngba katei ka jingialang, ki la shim ia ka rai ban pynjanai ha ka rukom treikam ha ki CHC, ki PHC, Sub-Centre, nalorkata la don ruh ka jingiakren ban pynjanai ia ka rukom treikam ha Nongpoh Civil Hospital, kata ka long haba iadei bad ka jingpynbiang ia ki dawai dashin, ka rukom ai jingsumar lem bad kiwei kiba long ka jingmyntoi na bynta ki paidbah.
Katba haba iadei bad ka jingiakren kaba iadei bad ka jingthmu ban kyntiew ia ka kam rep ha Ri Bhoi, ka jingiakren ka long ban pynheh ha ka rukom iarap pisa sha ki nongrep ha Ri Bhoi, khnang ba kin nanglah shuh shuh ha ka ban pynhep pyniar ia ka kam rep kam riang jong ki.

Haba la kut katei ka jingialang, ki MLA na Ri Bhoi, kiba kynthup ia u Bah Sosthenes Sohtun, MLA Jirang, Bah Mayraldborn Syiem, MLA Nongpoh, u Dr. Celestine Lyngdoh, MLA Umsning, u Bah Charles Marngar, MLA Mawhati bad u Bah Damanbait Lamare, MLA Umroi, haba kren sha ki lad pathaikhubor, ki la buh ia ka kyrpad ia ka Kong Ampareen Lyngdoh, Myntri ka koit ka khiah bad kaba peit ruh ia ka kamrep kam riang, ba ka dei ban shimkhia ha ka ban pynsngew sha ka sorkar jylla halor katei ka mat, kaba kum ki MLA na Ri Bhoi ki la dep ban shim ia katei ka rai, kaba dei kaba donkam eh na bynta ki paidbah ha Ri Bhoi.