Ka jingteh sai byrni, ka pynjem ne em ia ka jingpang Bangla?

Shillong:Ka jingsaphriang ka jingpang niangmat ne jingpang Bangla ha kine ki sngi, ka la pynlong ia ki briew ban leh da kiwei ki lad ban pynjem ne ban iada bad kata, ka long ban teh sai byrni na kti na kjat, khnang ban tehlakam ia kane ka jingpang.

Hynrei ha ka jingiakren bad u Dr. Robert Marak u District Surveillance Officer, ka East Khasi Hills u la iathuh ba kane ka dei ka jingngeit bym dei ban ngeit, namar ba u sai byrni um don jingiadei eiei ne iada ia ki khniang kiba wanrah ia ka jingpang Bangla.

“Ka dei tang ka khana hyndai. U sai byrni lada phi teh ha kti, kumno un iada iaphi, kam lah ban iada. Ka jingiada na kane ka jingpang ka dei tang na ka jingleh khuid, kumba long ha ka por Covid-19, dei ban thet bha ia ki kti ban ym iabit”, la ong u Dr. Robert Marak.
U la bynrap, “Ka dei ka jingngeit biej, ngam lah ban batai ia kata, ha kano ka dur u ksai un iada, kam don ka jingpynshisha ia kata”.

Haba kren mynta ka sngi halor kane, u Dr. Robert uba nang ban kren Khasi tiak tiak, u la iathuh ba kane ka jingpang ka saphriang bha ha kylleng ka ri namar ba ka dei na ka aiom bad hangne ha jylla Meghalaya kiba ioh ia kane ka jingpang kila kot sha ka 672 ngut tang ha East Khasi Hills bad kumba 1324 ngut ha baroh kawei ka jylla kaba dei naduh u Iaiong haduh u Nailar mynta u snem.

Kane ka jingpang ka ktah lut ia baroh khlem da khein ia ki khynnah ne ki rangbah bad ka saphriang na ka um, na ki tiar kiba la ktah kiba la ioh pang, kan sa iabit lang. “Kane ka jingpang ka neh kumba 5-6 sngi bad lada ka dang neh palat, dei ban leit iasyllok bad ki doctor”, la ong u Dr. Robert.

Ha kajuh ka por, u la iathuh ba kane ka jingpang ka sted bha ban iabit hynrei kam dei kaba lah ban ktah haduh ban poi sha ka jingma bad ki briew kim dei ban tieng kumba long kiwei kiwei ki jingpang hynrei kaba donkam ka long ban sumar bha, khamtam ban ym iapyndonkam lang kijuh ki tiar ki jain khnang ba kan ym ia bit.