Jan pulom ka tep briew ha Rilong

Shillong, 04 Risaw:
Ki ba haiing jong u Bah  Ktri Kharsahnoh (70 snem) uba khlad ki la kynnoh ba ki la shah khang ban tep ia ka met jong u ha uwei u briew uba la buh da ka Hima Mylliem ban peit ia ka shnong da kaba ai daw ba ka jaka kam dei jong ki. Kane ka la jia ha ka 30 tarik Nailur, 2015 ha shnong Rilong kaba don ha Ri-Bhoi.
Katkum ka jingia thuh ka president ka CSWO ka Kong Agnes Kharshiing, ia katei ka jaka la dep sam bad pynkhamti da ka shnong Rilong ha u Kpa ka Kong Lyndra Mawlong bad ka Kong Phlora Nongrum kumba leh ia kiwei ki nongshong shnong ka shnong jong ka Raid, ba kin lah ban rep ban riang ,hynrei kynsan kynsan ha katei ka sngi ba thmu ban tep, la wan khang uwei u briew uba kyrteng u Swanding Nongspung uba thung ka Hima Mylliem kum u dkhot ha katei ka shnong da kaba kynnoh ba ka jaka kam dei jongki.
La kynnoh ba u la ong ba katei ka jaka ka dei jong ka Hordalin Lyngdoh Nongbsap kaba sah shabar shnong. Hynrei, kiba haiing jong u Bah Ktri ka khun jongu ka Kong  Lyndra Mawlong ka la don ki kot ki sla ba la pynkhamti da ka shnong ba ka dei jongki naduh ki phew snem ba la dep.
Kaba lyngngoh ka long ba u pulit u la wan sha katei ka iing bad phah wan mih sha police outpost ha Umsning la sngi Nyngkong.
Hynrei, namar ba kine kiba haiing u Bah Ktri ki lah ong ba U kpa jong ki u lah kwah ba kin tep ha kata ka jaka sa nalor ba um shim dei niam hangno hangno, te ki lah tep ia u ha ka ta ka jaka jong u hi, la ong ka Kong Kharshiing.
Ka Kong Kharshiing ka la ong ba kaba lyngngoh ka long ba ki don bun bah ki longiing ha kane ka shnong kiba la sah da ki phew snem ha kane ka shnong kaba dei ka jaka Raid bad lah don ki longkmie kumba lah shi snem shuwa ki lah bthah ban rejister ha ka ophis u Syiem Mylliem da kaba hap siew haduhT. 50,000 ba kin ioh ia ki kot ki sla khyndew.
”Kane ka jingleh ka dei ka bym iahap satia kaba thmu ban iuhroit ia ki briew kiba duk”, la ong ka president ka CSWO bad bynrap ba ka dei ka kamram jong u Syiem ban peit ia ka bha ka miat jong ki khun ki raiot ym ban pynkylla nongphet wir pynban ia ki trai shnong.
Ka CSWO ka pyrshah jur ia kane ka jingleh jong ka bor Hima ban thombor ia ki briew kiba dei ki trai shnong da kaba pynkhein ia ka riti dustur jong u Khasi tang na ka bynta ka jingthmu ban kamai spah ia ki katto katne.