Shimti ka CBI, ban set phatok, ia kiba law lymbuit bad batbor ia ki kynthei ha Manipur

Imphal:Ka kynhun tohkit jong ka sorkar pdeng,ka Central Bureau of Investigation (CBI) ka la set pathok ia ki 6 ngut ki briew kiba la shah kem ha ki pulit jong ka jylla Manipur haba iadei bad ka jingdonbynta jong ki ban pyniaid lyngkhuit ha ki paidbhur ha jylla Manipur.

Na ki 14 ngut kiba la ithuh, lyngba katei ka video, 7 ngut kiwei pat, kynthup ia u ba dang hapoh 18 snem ka karta, ki la ia don bynta ha kane ka kam bad ki la shah bat noh ha ki pulit.
Ia u ne u ba dang hapoh ka 18 snem ka karta, la rah noh sha ka ïingsah jong kito ki nongpynkheiñ aiñ kiba hap hapoh 18 snem.

Ha ka sngi balang ka CBI ka la rah ia ki 6 ngut ki briew na bynta ka jingtohkit haba iadei bad kane ka jingjia.
Hadien ba la set ia ki saw ngut ha along jong ka CBI la lai sngi,sa ar ngut kiwei pat la rah lang sha katei ka along, ha kaba la poi sha ka 6 ngut.
Ha ka sngi ba ar kine kiba shah kynnoh la rah sha ka ïingbishar ba kyrpang jong u court special judge & prevention atrocity act, ha Thoubal.

Hadien ba ki la pyndep ban sah ia ka por ba la buh ha along jong ki pulit la rah ia ki da ki pulit jong ka Thoubal district.
Ka CBI ka la phah ia ka jingthoh sha ka ïingbishar ba kan shimti bad tohkit ia kane ka kam pyrshah ia kine ki briew kiba la shah kynnoh.
Hadien ba la shong pyrkhat bad mir jingmut bha ka ïingbishar ka la ailad ia ka CBI ba kan shimti hadien ka jingkyrpad.

Ki ar ngut, ka ïingbishar ka la ailad ba kin don ha along ka CBI haduh ka 8 tarik Nailar bad kiwei pat kin don tang ha ka 2 tarik Nailar.
Saw ngut kiwei pat ki la don ha along jong ka CBI, la palat lai sngi.
Ha ka jingia ba la jia ha ka 4 tarik Lber, ha kaba ki arngut ki longkmie ki la shah thombor bad pyniaid lyngkhuit, katkum ka dur video ka ba la sa phriang sted ha ki rynsan social media, ka Tnad CBI ka la shimti ban pynlong ia ka jing tohkit.

Ha ka video la iohi ba kine ki longkmie ki la shah pyniaid lyngkhuit ha ki paidbhur, kane ka la paw pyrthei bad pur sted bha ha ka 19 tarik naitung ha kaba ka la pynkhihwin hi puk ia ka ri baroh kawei haba iadei bad ki kam sniew kiba la jia ha ka jylla jong ka thaiñ shatei lammihngi.