Surok shi surok, baroh ki lynniar tang ia ka jingjot rathai

Kat shaba iaid, lada dei sha Riwar, sha Ri Khasi, sha Ribhoi sha Ri Jaintia bad wat sha Garo hills, ka mih beit tang kawei ka sur bad kata ka long, ia ka jingsniew tasam ki surok bad ki sla jong ki kotkhubor, ki dap, da ki dur jong kitei ki surok, kiba jot rathai, ha kaba la ujor da ki nongshong shnong, ki seng bhalang bad kiba ieid ba ieng, ha kitei ki surok rit bad ki surok bah.

Kitei ki surok, kiba sniew, ki long mar katjuh, khlem iapher eiei ruh em, hapdeng ki surok jong ka sorkar India, lane ki National Highway bad nangta ki surok jong ka sorkar jylla, lane ki state road bad katei ka pyn pyrkhat, ia uba bun, ba kumno sha, ba ki surok jong ka sorkar India ruh, kin kham sniew pynban, ia ki surok jong ka sorkar jylla.

Ki surok, kiba don ha ka jingshah kynthah jur, ha kine ki sngi, ki kynthup ia ka surok Shillong Jowai, kaba iasoh shaduh sha Assam bad nangta, sa ka surok na Shillong sha Dawki, kaba iasoh sha Bangladesh bad kine ki dei ki surok, kiba la sumar da ka National Highway Authority of India (NHAI) bad nangta sa ka National Highway & Infrastructure Development Corporation Limited (NHIDCL) bad lait nangta, ki don sa ki surok, kiba la thaw hi da ka sorkar jylla, kiba shu jot rathai, kat shaba leit bad kitei ki kynthup ia ka surok na Shillong sha Mawkyrwat, ka surok Shillong sha Shella bad sa kiwei de kiba pyniasoh sha ki shnong bapher jong ka Ri Khasi Jaintia.

Ka Meghalaya, ka don surok, ha ka jingjrong kaba 9666 Kilometre, katba kum ka jingthoh jong ka tnat PWD, ha u snem 2015 bad ha ka elekshon ha Tura, U Nitin Gadkari, myntri pyniaid surok, u pynbna, ba un trei ia 1,617 Kilometre ki surok National Highway ha Meghalaya bad lada khein lang ia kitei, ka jingjrong jong ki surok, kan poi sha ki phew hajar kilo metre haba kynthup ia ki surok shnong bad ki surok heh jong ka sorkar India.

Ka Meghalaya, ka dei ka jylla, kaba rit tam, haba ia nujor bad kiwei ki jylla heh jong ka India bad U PA Sangma, uba dei u nongialam barim ka jylla, ula ju ong, ba ka jingdon briew ha Meghalaya, ka dang ia ryngkat bad ka tnat dewiong (coal India), kaba ula bat teng kum u myntri; hynrei, kaba lyngngoh, ka long, ba balei, ka hiar shibun ka roi ka par bad ka ioh ka kot, ha kane ka jylla, ha ka tnat surok, ha ka koit ka khiah bad sa shibun, kiba ym donkam ban iatih jylliew.

Kawei na ki mat, kaba hap ban ia sngewthuh shai, ka long, ba balei, ka sorkar jylla, ka leit aiti lut, ia baroh ki surok National Highway, ha ka sorkar India; namar ba ha ki phew snem mynshwa, la buh khnang, ia ka tnat National Highway, ba kan sumar, ia kitei ki surok bad ba la ju pyntrei, da ki kontraktor trai shnong, katba ia ka jinglut la bei da ka sorkar India.