Snohkti lang ki riew paidbah bad ka KSU, ban iakhih pyrshah, ba lip bording

Nongpoh:Haba la sngewbitar eh halor ka jingthut ba khah khah ka bording ha ki shnong kiba don ha ka thain Nongpoh hi baroh kawei, ki nongialam ka KSU Nongpoh Circle, mynta ka sngi ki la pyn long ia ka jingiaiaid paid bah, kaba ki la sdang na Pahamsyiem ter ter shaduh ophis u Sub- Divisional Officer ka MeECL Nongpoh Division bad hadien kata pat ki sa leit ban buh jingthoh sha sha ophis u Deputy Commis sioner ka Ri Bhoi.

Katei ka jingmih shakhmat da ki KSU, ka dei hadien ba ki la bitar eh halor ka jingthut ka bording ha ka thain Nongpoh, kaba la pynjynjar eh ia ki paidbah, ia ki khynnah skul, ki samla pule bad ia kiwei kiba trei ia ki kam bapher bapher.

Ha katei ka sngi, ba kitei ki KSU Nongpoh Circle, ki la pynlong ia katei ka jingiaiaid paidbah, la wan ban synran da ki nongialam ka KSU, NKHD, nangta kiwei ki seng kiba kynthup ia ka FKJGP, RBYF bad HNYF. Nalorkata sa ki khynnah skul, ki nonghikai bad ki riew paidbah ka thain Nongpoh, ki la iashimbynta lang ha katei ka jingiaiaid paidbah.

Lyngba jong katei ka sngi, ba ka KSU ka la pynlong ia katei ka jingiaiaid paidbah, ki la pynmih ia ka sur ba dawa na ki bor ba deipeit, ba ki dei ban buh kyrkieh noh ia u 132/33 KV Substation, khnang ba kan iada na ka jinglip bording kaba khah khah ha ka thain Nongpoh bad ha Ri Bhoi hi baroh kawei.