Ka RMD&SWC kum ka kynhun ki riew rangbah ka thain Marwet, ban peit ia ka bha ka miat bad ia u pud u sam

Nongpoh: Ki la don ki riew rangbah na ki shnong bapher bapher jong ka Raid Marwet, ki la thaw ia kawei ka Committee bad kaba la tip kum ka Raid Marwet Development & Social Welfare Committee (RMD&SWC) bad ia katei ka Komiti, ki la leit ban pynithuh myn sngi saitjain, hakhmat u Syiem ka Raid Marwet.

U Bah Munu Shakwa, uba long kum u President jong katei ka kynhun ha ryngkat u Bah Liam Pator kum u General Secretary, ki la ong ba ki la thaw ia katei ka Komiti, ka long na ka bynta ban peit ia ka bha ka miat bad ka shongsuk shongsain ha ki shnong bapher bapher ha Raid Marwet.

Shuh shuh, ki la ong ruh ba katei ka Komiti ka don ia kata ka jingangnud ban peit kyrpang halor u pud u sam, namar katei ka thain ka dei kawei na ki jaka khappud bad ka Assam, kumta ka long kaba donkam ban don kiba kum kitei ki Komiti, khamtam eh ban ai ka jingiatreilang bad u Syiem ka Raid Marwet.

Lyngba jong katei ka sngi, ba ki nongialam katei ka Komiti, ki la leit ban pynithuh hakhmat u Syiem, na ka liang u Syiem ka Raid Marwet, u la ai ka jingkular ban ai ka jingiatreilang, na ka bynta ka bha ka miat ki paidbah hapoh ka Raid Marwet hi baroh kawei.