Mar sien dep shna sniew noh ka Surok Industrial Estate

Jowai, 2 Risaw:
Ka Surok kaba jrong tang kumba 500 meter na Surok bah ban poi sha Industrial Estate kaba don ha Khliehtyrshi ka la sniew noh tang hadien shibnai ba la dep shna ia ka.
Ka jingsiew jong katei ka surok ka la wanrah jingeh ia ki khar khana ot dieng kiba don hapoh katei ka Industrial Estate.
U President ka Jaintia Industrial Estate Manufacturers and Industrialists Association (JIEMIA), u ma Wanpynsuk Passah u la iathuh ba ka MIDC kala pyntrei ia katei ka surok ha u Lber mynta u snem bad la sniew noh tang ha u bnai Iaiong.
Ka tyllong khubor na ka MIDC ka la iathuh ba la pyntrei ia katei ka surok da ki lai ngut ki contractor ha ka jinglut kaba palat 15 lak tyngka eiei.Na ka liang u ma Passah u la iathuh ba na ka liang kiba don kharkhana ha katei ka Industrial Estate ki la dep ujor bunsien ia kane sha ka MIDC.Katei ka surok kadei kaba dang thymmai namar naduh ba ka sdang ia ka Industrial Estate ha Jaintia Hills ym pat shym la shna ia ka surok. Ka jingsniew katei ka surok ka la buh jingeh ia ki trok kiba wan kit dieng sawdong shapoh katei ka Industrial Estate namar haba sahkut kawei, baroh ki sakut lang da ki bun bun kynta ha shwa ban ioh pynhap ia ki dieng.
Haba iakren bad ki sahep ka tnad MIDC, kila iathuh ba shen kin sa pyntrei biang ia katei ka surok ynda rang ka bneng. Ngin pynlong shwa ia ka jingjurip bad ngin sdang noh ban pyntrei biang, la ong ka khubor na ki sahep ka MIDC.