Burom, syiem ia kiba iap, khein ksew ia kiba dang im

Ngi iohi, ha kine ki sngi, ba ki briew, ynda ki la iap, ki ioh ia ka burom, kaba khraw tam, lada dei ha ka kur ka jait, ka kam shikhun shitnga, ka kam shnong kam thaw bad wat ha ka ri hi ne ka pyrthei bad la ju iakren bha ruh, ba u briew, u bym ioh satia, ban taw, wat tang shi kham ka ja, ha shwa, ba un iap, hynrei, u tang shu dkut mynsiem, ki iap ki sniang, ki syiar, ki masi, ban ia khawai paidbah.

Wat ha Parliament, ha Delhi; la iohi, ba haba ka don ka jing ia khluit ia bitar, ka jingshah beh noh ki dkhot, kiba bun ki leit ban shong pyntngen ialade ha khmat ka dur jong U Mahatma Gandhi bad kam dei tang katta, mangi ruh hangne, ha kiba bun ki khep, ngi kynmaw, ia ki khla wait ka jaitbynriew, nangta ngi kynmaw ia ki nong ialam, kiba la leit noh na ngi, lane ngi kynmaw ruh ia la ki jong ki mei tymmen, ki kpa tymmen bad kiba dang iajan bad don jing iadei bad katei ka dei ka jing pynthanda, ia la ka jingmut na ka jingbitar ne ka jingshah niewbein ha kiwei bad ban pynkynmaw ia ki jinghikai ba bha jong kitei ki kmie ki kpa lane ki meisan ki pasan, ba ki ju hikai iangi, ha ka longbriew manbriew.

Ka jingshisha, ka wan pat hangne, ia kaei kaba ngi la leh ia kitei kiba ngi burom (ynda ki la iap), ha ka por ba ki dang im; namar ba ki don bun bah, lada dei kiba pang, kiba la tymmen, ba la leh ia ki, kumba leh ia ki ksew lane ia ki mrad, ha kaba kiba pang, ki thiah pang marwei bad u tymmen, u ud u iam marwei, nangta sa ka shah byrngem byrsit, shah tim shah tla; namar ba ki khun ki tnga, kim don por ban sumar ne ban shakri, hynrei, ki iaid bunkam ialade shaneng sharum bad lada dei uba riewspah, kin kren ieid, tang ha ka por, ba ki donkam ia ka atm card jongu, hynrei lada dei lei uba duk bapli, kumta, da ki khmat pynat bad peitdom suda.

Ha ka jingngeit u khasi, lane ka jingngeit u khristan, la ju shim, ba u briew, uba im hok, unda la iap, un sa poi sha dwar jong U Blei bad haba kum kine ki jinglong, kumta kaei kaba phi khmih lynti, na kitei kiba iap, lada dei ki tnga jongphi, ki kmie ki kpa, ki meinah meisan jongphi bad katei ka long, sa tang ba kin tim iaphi, ba phin mad ia ka jingpang king janor, ka jingpang jingshitom, ka duk ka lanot, kumba phi la leh kput ia ki.

Ka la dei ka por, ban pynduh jait noh, ia ki jing khawai dap snem, ban tei mot bad leit buh syntiew, ha man ka sngi kha ne ka sngi iap jong kiba ieid ba thoin, ban thad ia ki dur jongki ha ki social media, ban iawer ia ki kur ki kha, na shajan bad shajngai; hynrei kaba donkam, ka long, ba lada ngi ieid hok, ngi dei ban ieid, ha ka por, ba ki briew, ki dang im, ban shakri, ha ka por, ba ki dang im; hynrei, ynda ki la iap, ki la don ha dwar U Blei; ngim donkam shuh ban sei ia ki ummat arsap kuratia bad ban niew burom ia ki.