Ka jingiohlad eh ki khynnah rit, ban ialehkai internet, ka ju wan rah shibun ka jingsniew ban ia ka jingbha bad katei ka dei ka jingshisha, ha kaba uwei u khynnah rit, uba dang phra snem ka rta, ula thied syndon da ka suloi AK 47. Ka kmie jong utei u khynnah rit, ka Barbara Gemen, ka dei kaba na Netherlands bad ka iathuh ia shibun bah ki kam beain, ba la leh da u khun jongka, uba dang 8 sem ka rta ha ka internet, lane kaba ki ong cyber crime bad kam dei tang katta, ka iathuh, ba ula thied ia shibun ki tiar ki tar, na internet bad kawei na kitei, ka dei ka sulok AK 47.
Ha ka jingiakren jongka bad ka Euronews, ka iathuh khana, ba utei u khynnah, u ju pynlut por bha, ban ialehkai ha computer bad ha katei ka rukom ialehkai, u leit lap ia ki jaka ba die jingdie bad u la thied jingbam, kiba bun jait bad don kiba shu ioh ei, ha kaba ki nongdie, ki ju wan rah sha iing jongu bad ha kaba nyngkong eh, ka iathuh, ba u wan poi shwa u pizza, uba ki shu ai, hynrei hadien hadien, ula thied sa kiwei pat ki tiar, kiba kham remdor bad kiba bun jait bun rukom.
Ka iathuh ruh, ba u ju buhrieh, ia kitei ki kam khyllah jongu, da kaba u pynkylla kyrteng lane u pynkylla ia ki code number bad ka dei hangtei, ba u ju iakren bad ki nongialehkai online games bad u ju iarap ruh, ha kaba thep pisa beain ha ki account jong ki briew.
Ha kawei ka sngi, kaba la pynkyndit ia ka Barbara, ka long, ba haba ka wan poi ka suloi AK 47 ha iing bad hangta, ka sngewthuh, ba u khun jongka, ula leh ia shibun ki kam runar, da kaba pyndonkam ia ka internet bad ka ioh jingtip ruh, ba katei ka suloi, ka iaid lyngba na Poland sha Bulgaria, ban lait na ka jingshah bat ha ki bor tohkit; hynrei ka donbok, ba ka leit ioh da ka kti lajong, ban shim ia katei ka suloi bad ka sa leit aiti noh ha ki bor pulit. Hangtei ruh kam kut satia bad ka iathuh, ba u sdang ban sngewsih, haba ula shah knieh noh, katei ka suloi bad un iai bteng ban shong miet ban ialehkai bad ki riew runar, kiba triem kiba ju don bynta ban thok briew, ha ka ialehkai online.
Phi don ban ong eiei?