Ka jing maramot ia ka surok Shillong, Dawki, kan dang shim por, ong u heh NHIDCL

Shillong:U General Manager ka NHIDCL u Ashish Shukla ula iathuh mynhynnin ka sngi ba ka jingmaramot ia ki jaka ba sniew ka surok bah NH44 kan shim por namar ba hap khot tender shwa.

Haba kren mynta ka sngi, u Ashish ula ong ba tang ia ka package 4, la dep ban khot tender katba ia kiwei ki package ba kynthup 3, 5 dang hap ban khot tender. Kine ki package ki dei ba hap ha Pynursla Civil Sub-Division, ha kaba ka surok ka la sniew jubor haduh katta katta.

“Ngi la dep khot tender ia ka package 4 bad ia kiwei dang pynkhreh ban khot tender ban maramot”, la ong u Ashish.
U la bynrap, ” Kan shim por katto katne por, namar hap ban iaid katkum ka rukom bad hap ban ioh ia ka jingmynjur na ka bor ba halor”.

U Ashish ula ong ba ka kompeni NHIDCL kan pynsted ban maramot kloi, katba lah ia ki jaka ba sniew ka surok.
Lah ban kdew ba ka KSU South Central ka la pynlong ia ka jingiakhih ha ka 1 bad 2 tarik u Nailar ban wan ban dawa ban pynbha bad maramot noh ia katei ka surok kaba la sniew tasam.