Ar ngut ki nongphla

AIS Suja

Ar ngut ki nongphla, (Two witnesses). U Ioanis Nongiathuhlypa, u iathuh da kaba ong – “To ieng to thew ia ka Temple u Blei bad ia ka Duwan bad ia kita kiba mane ha ka. Ka phyllaw shabar ka Temple u Blei, men iehnoh ia ka, men ym thew ia ka: naba la ai ia ka ha ki Jentil. Ia ka nongbah kaba khuid kin iuh top ia ka sawphew ar bnai. Ngan ai bor ha ki Nongiathuhlypa jong nga, te kin iathuhlypa Shi hajar arspah hynriewphew sngi” Jingpynpaw 11:1-3.

Kiei kine ki Arngut ki Nongphla? Ki dei u Enoch bad u Elijah, lane u Moses bad u Elijah. Kane kan jia hadien ka jingmihpat kiba iap (resurrection).
Bad kane ka jingjia kan jia hapoh kata ka por jong ki Shi hajar Arspah Hynriewphew sngi (1260) sngi. Kaba mut ha ka por ki 3 snem shiteng kaba ar jong ki 7 snem ne kata ka shitaiew kaba khadduh. Daniel 9:27.

“Ka phyllaw kaba shabar kata ka Temple u Blei men iehnoh men ym thew ia ka” ka mut ba ia ka phyllaw jong ka Temple ki Musulman kaba don mynta ha Temple Mount ym bit ban ktah ia ka, hynrei yn pynieng ia kata ka Temple u Blei (Third Temple) ha ka jingjngai kumba 100 phut ei ei na ka Dome of Rock. “Naba la ai ia ka ha ki Jentil” kaba mut ba u Blei u la ai ia kane ka jaka Dome of Rock ha ki Musulman halor kane ka Temple Mount ha Jerusalem ha Israel.

Ia kata ka Nongbah Bakhuid (Holy City) ka Jerusalem kin ia iuh top sawphew ar (42) bnai. 42 bnai ka mut 1260 sngi lane 3 ½ snem katkum ka calendar jong ki Jiw. Kin iuh top ka mut ba u Mrad khlaw un synshar na kane ka Temple kaba Lai hapoh ki 3 ½ snem kaba Ar ne kita ki 42 bnai ne 1260 sngi. U Blei un aibor ia kito ki Arngut ban iathuhlypa ha Israel namar ka jingbymngeit jong ki naduh basdang u Messiah jong ki uba long u Jisu Khrist.

Kine ki Arngut ki Nongiathuhlypa u Blei ki don ka bor ban pynsniew da ka ding. Ki don bor ruh ban khang khop ia u slap hapoh kita ki sngi ba ki iathuhlypa halor ki Israel. Jingpynpaw 11:4-6. Te hadien kane ka jingphla jong ki (ia u Jisu) u Mrad khlaw un ialeh thma ia ki bad un jop bad un pyniap ia ki hapoh kita ki 42 bnai. Ki metiap jong kita ki Arngut kin sah ha lynti shnong lai sngi shiteng ……. Naba kine ki Arngut ki nongiathuhlypa ki la iap kordit. Te hadien Lai sngi shiteng u Mynsiem ka jingim na u Blei u la bsut ha ki bad ki la ieng joit te ki briew ki la sheptieng ia ki. Te kan jia ka jingkhynniuh jumai bakhraw, te la pyniap 7000 ki briew. Kiba dang sah te ki la sheptieng eh – bad ki la ai burom ia u Blei ka bneng. Jingpynpaw 11:7-13.

Kine kiei kiei kin sa jia ha ka por ka ban sa wan ka ong ka ktien u Blei, “Suk uta uba pule bad kita kiba iohsngew ia ki ktien jong kane ka jingiathuhlypa kiba sumar ia kita kiei kiei ba la thoh ha ka: KATA KA IA KA LA JAN” Jingpynpaw 1:3. Amen.