Ha ki khyndiat sngi ba ladep, ka Niti Ayog, kaba dei ka tnat kaba buddien ia ka ioh ka kot jong ka sorkar India bad kumjuh ha ki jylla bapher, ka la pyni, ia ka kaiphod kaba sniew bha, halor ka jinglong jingman jong ka Jylla Meghalaya bad kata ka pyni, ba ka jylla, ka dei, kaba duk tasam bad ka shu kham kiew khyndiat ia ka Bihar, kaba ioh 37.21 percent, katba ka Meghalaya, ka ioh 31.03 percent bad katei ka jingjia, ka la pynkyndit ia kiba bun, namar ba ka Meghalaya, ka kham duk palat, ban ia ka Uttar Pradesh, kaba dei ka jylla, kaba heh tam ha India.
Ha kawei pat ka liang, ka Association for Democratic Reforms (ADR), ka pyni ba u Conrad Sangma, myntri rangbah ka jylla, u dei uwei na ki 10ngut kiba riewspah tam ha India bad hangtei ruh ka pyni, ba ha ka jingkiew spah, u myntri rangbah ka Meghalaya, u riewspah duh ma u, wat ia ka myntri rangbah jong ka West Bengal, ka jylla kaba heh, Delhi, Uttar Pradesh bad kiwei bad ka jingdon spah U Sangma, ka poi sha ka T.14.06klur.
Ka mat hangne, kaba hap iakren, ka long ba kumno, haba u paidlang ka jylla, u duk tasam, katba ki nongialam pat ki riewspah bher bher bad kane ka pyni, ia ka jinglong jingman, ka bym lah ban pyrkhat briew ba kumno ka pisa ka shong shiliang, hapdeng ki myntri sorkar lane ki nongmihkhmat, ha kaba ki riew paidbah, ki don ha ka jingduk tasam bad lada kren ha kawei ka kyntien, ka paw ba ki kmie ki kpa, ki bam bang, bam thiang tang ialade shitnga, katba ia ki khun, ki ai tang, da ka ja bad ka mluh.
Hynrei, kane ka sah, tang ka jingiakren bad kam don kano kano ka bor ha Meghalaya, ka ban tih tyllong ia ka jinglum spah jong kine ki myntri jylla, ha kaba u Ma Sniawbhalang Dhar, lei, u lum spah haduh T.45klur, na ka ka jingkhein, kaba la pyni da ka ADR bad katei ka dei ka jingkiew kaba haduh 607 percent, namar ba ha u snem 2018, u don pisa, tang 6klur, katba ha u 2023, ka kiew buk buk sha ka T.45klur.
Kitei ki jingjia, kin nym jia satia, lada u paidbah, u don ia ka jingsngewthuh kaba shai, ba un nym shah ia ka bamsap bamtuh jong ki nongialam sorkar, lane ba yn kyntait noh, ia ki nongialam, kiba la shakri ia ka spah, ha ka jaka ba kin shakri ia u paidbah ka Constituency; hynrei hangne, la iohi, ba u paidbah hi u kynshoit bad u kwah ia bam lang, ia katei ka kamai bym hok bad kumta, u minister, un bam ialade 90 percent, katba ia ki riew lalot, kiba kyrshan ia u, un sam tang ia kaba ula dep iuh da ka kjat, kaba long 10 percent tam ne duna duh.
Ka synshar paidbah ha Meghalaya, ka shu iaid mata madei, namar ba ki don ki sengbhalang, kiba dang khyllie ia ki ishu bapher bad lada kim don lei kine; kine ki myntri sorkar, kin shu shu sdieh tyrkhong syndon, ia ki nongjied jongki, haduh ba kin da sah sa tang ka snep.
ba ki nang ban bam sap ,ki bam ja ,bam doh ,bam jhur ki heh sorkar ka jing bam jong ki ka kylla long pisa , hynrei ka ka jingbam jong ki heh sorkar da bam ki paidbah pat ki sniew bok namar ba ka kylla eit