Shah ther maw, ka jaka jingialang U MR bad ki ACHIK, mynsaw 5ngut ki pulit

Shillong:Ka jingiakulmar ka la mih shabar jong ka jaka pynlong jingialang hapdeng u Myntri Rangbah jong ka jylla Conrad Kongkal Sangma bad ki dkhot jong ki kynhun seng bhalang ha ka janmiet sngi nyngkong, ha kaba ki paidbah kiba dang ap ia ka jingialang, ki la sdang ban kawang maw, hadien ba ka jingialang ka la neh slem bha namar ki kwah ban tip ia ka jingmih na katei ka jingialang.

Ka jingialang u Myntri Rangbah ka iaid beit bad kine ki kynhun seng bapher bapher, ha Ophis treikam u Myntri Rangbah ha Tura, ha kaba katto katne ki briew, kiba la kawang maw sha katei ka ophis treikam bad pyrshang ruh wat ban plie ia ka khyrdop.

Kane ka jingialang ka la neh kumba lai kynta bad kine ki dkhot sengbhalang ki la sdang ban kawang maw ban pynpra ia katei ka Ophis treikam, ha kaba ki pulit pahara ki la sdang ban tehlakam ia kane bad kumba san ngut ki pulit pahara ki la mynsaw, katba na ka liang jong ki pulit, ki la hap ban siat da ki lyer pynsatkhmat ban pynpra ia ki paidbah.

Kane ka jingiakhih ha ka jingialam jong ka ACHIK bad ka GHSMC ban pynlong ia ka jingshong shah thngan ba la neh artaiew ha Tura West Garo Hills District, kiba la dawa ban pynlong ia ka nongbah Tura kum ka nongbah tlang bad ban phaidien biang ia ka roster system.

Kane ka jingialang ka la dei kaba ki kynhun seng bhalang na rilum Garo ki kwah ba ka jingdawa jong ki kan seisoh bad u myntri rangbah, ha kaba ka jingdawa ka jong ki, ka la pynkhihwin ruh ia baroh kawei ka rilum Garo, ha kaba kiba bun ki kynhun ki la wan ban iasnohkti lang ha kane ka artaiew. Ki paidbah ha ka janmiet sngi nyngkong kiba la ap ia ka jingiakren ha kane ka jingialang ki la poi da ki hajar tam.

Hadien ba ka long ka man ka jia kumne, na ka liang jong u Myntri Rangbah u la peit hi dalade ia kine ki pulit pahara kiba la mynsaw bad ia ka long ka man.

Namar ka jingmih jong kane ka jingkulmar, u Myntri Rangbah u Conrad Kongkal Sangma lem bad u myntri jong ka tnat PHE u Marcuise Marak lem bad ki nongialam jong ki kynhun seng ki dang don hapoh jong ka jaka, pynlong ia ka jingialang.

Wat la ka la don ka jingsiat ia ki lyer pynsatkhmat ki paidbah ki khlem phet satia bad ki pynlong ruh ia ka jingkawang maw ia katei ka ophis treikam jong u Myntri Rangbah ha Tura.

Katba ki nongialam jong kine kynhun seng ki dang pyrshang ban pynjem ia kine ki briew ki khlem lah satia, namar kim dei ki dkhot jong ki kynhun ka jong ki.