Shillong:Kan long biang ka jing ia aireng ban knieh ia ka nam lahduh jong ka lympung Women’s League, hapdeng ki ar tylli ki kynhun kiba la ioh ban iakhun myn ha u snem uba la dep, hadien ba kitei ki kynhun ki la lah ban pynliem ia ka PFR bad ka Lumparing ha ka jing iakhun ia ka semi final ba lah ialeh myn ha ka sngi saitjain ha SSA Stadium First Ground Polo.
Ha katei ka jingiakhun ia ka semi final la iohi ba ka Laitkor ka la lah ban beh thong bad lam khmat ia ka Lumparing SC da 4-1, katba ka Mawlai ka la jop ia ka PFR Foot ball Academy da ka Penal ty shootout da 4-2 hadien ka jingialeh kaba khaid bha hapdeng kine ki kynhun da ka jingiadraw da mar 1-1.
Da ka jingiakyn duh biang jong kitei ki ar tylli ki kynhun ha ka final ka ban ialeh ha ka 29 tarik Naitung kan long kum ka jingbteng ia ka jingiakhun kaba kitei ki kynhun ki la ioh ban ialeh ha u snem ba la dep, ha kaba ka Mawlai ka la ioh ban rah ia ka nam lahduh da kaba jop 2-1 ha ka jingiakhun kaba la bteng sha ka extra time. Ia ka jingiakhun final mynta u snem yn pynialeh biang ha SSA Stadium naduh ka por 3:30 janmiet.
Ha ka jingialeh kaba nyngkong, ka Catherine Kharkongor ka la ioh ban lamkhmat ia ka Lumparing ha ka minit kaba 15 hadien ba ka la ioh bol na ka kornar bad kynjat tyngeh shapoh ka jar.
Hadien ka jingshah thep, ka Laitkor ka la sdang ban ai jubab da ka jingpyni bor ka Nisilia Majaw kaba ialeh na ka phang ka diang hynrei ka la shim por ia kane ka kynhun haduh shwa ban kut ka kylla step ha shuwa ba ka Iaraplang Nongrum kan ioh ban pyni ia ka sap bicycle kick jong ka ban pyniaryngkat noh ia ka jingialeh ha ka minit kaba 35+2.
Da ka jingioh ban pyniaryngkat noh ia ka jingialeh, ka Laitkor ka la ioh mynsiem ban nang rah shuh shuh ia ka jing ialehkai jong ka ha ka kylla miet.
Katto katne ki buit ialehkai jong ka Majaw ki la pynlah ia ka ban phah bol itynnad bha na ka phang ka diang ia kaba ka Iaraplang ia ka ioh ban shim ia kitei ki kabu ban lamkhmat noh ia ka Laitkor ha ka minit kaba 55.
Tang san minit hadien, ka Saralin Warlar pih ka la ioh ban thep lyngba ka kornar ha ka minit kaba 60 nangta ka Iaraplang ka la ioh biang ban thep ha ka minit kaba 64 da kaba pynpra ia ki nongiada ka liang pyrshah bad tur sha pyrshah ban ioh ban thep ia ka kol kaba lai jong ka ha kane ka jingialeh.
Ha shuwa ban kut ka jinglehkai, ka Lum paring ka la pyrshang biang ban teh lakam ia ka jinglehkai bad la iohi ba ki paidbah ki la ia risa ban ai mynsiem ia kane ka kynhun hynrei horkit hordang kim shym la lah ban pynpra ia ki nongiada ba skhem jong ka Laitkor kiba ieng triang ban pynneh ia ka jinglam khmat kaba la pynjop ia ka da 4-1. Ka Iaraplang kaba la ioh ia ka Hat-trick ha kane ka jingiakhun ka la ioh ia ka nam player of the Match. Ha kawei pat ka jingiakhun kaba la pyn skhuin ia kiba bun, la iohi ba dei sa tang ka tie brea ker kaba lah ban pyn ioh ia ka nongjop hapdeng ka Mawlai bad ka PFR.
Ka kynhun kaba dang bat ia ka nam lahduh ka la sdang ia ka jinglehkai da kaba jaj jai hynrei ka la tyngkhuh tyngeh ia ka PFR kaba la pyni ia ka jingkut jingmut jong ka ban poi sha ka thong. Ki ar tylli ki kol ki dei kiba la thep ha ki minit kiba mar iajan iwei ia iwei ha ka kylla step jong ka jinglehkai. Ka kol kaba nyngkong ka dei kaba lah thep da ka Marbarin Nongrum na ka Mawlai ha ka minit kaba 19 hadien ba ka la ioh bol na sha shiliang bad thep shapoh ka jar jong ka PFR kaba la ap da ka Yulity Phanrang.
Hadien katto katne minit, ka PFR pat ka la ioh ia ka free kick ha kaba kut jong ka pitch kaba la jngai kumba 75 phut ei ei na ka kol. Hynrei katei ka jingjngai kam shym la pynartatien ei ei ia ka Cynthia Mylliem Umlong hadien ba ka la kynjat tyngeh sha pyrshah ka nongap kol bad ka la rung beit beit shapoh ka jar ha ka minit kaba 22.
Watla ka la don ka jingiakhun kaba mar ialeh haduh kaba kut ka kylla miet bad wat ha ka jingbteng ha ka extra time hynrei kitei ki ar tylli ki kynhun, ki la pyneh triang ha ka jingiadraw kaba mar 1-1. Kumta ban ioh ia ka nongjop ha kane ka jing iakhun, la wanrah noh da ka penalty shootout bad ha kane pat ka jingialeh, ka Mawlai ka la lah ban kamai 4 kol katba ka PFR ka ioh tang 2 kol. Ha kaba kut katei ka jingiakhun, ka Marbarin ka la ioh ia ka nam Player of the Match.
Phi don ban ong eiei?