Hukum ka seng kaikhlaw barim, ba kin phet noh ki Meitei na Mizoram

Imphal:Ka sorkar Manipur, ka don jingthmu ban leit shaw noh ia ki jaitbynriew Meitei, kiba don mynta ha Mizoram. Kane ka dei, na ka jingbyrngem jong ki kaikhlaw barim jong ka Mizoram, ba ki Meitei, ki dei ban mih noh, na katei ka jylla, na bynta ka jingshngain jongki hi.

Katei ka seng, ka Peace Accord, MNF Returnees Association (PAMRA), ka kren shai, ba ka don ka jingbitar kaba jur jong ki samla Mizo, hadien ba ki arngut ki kynthei Kuki, ki la shah law lyngkhuit bad pyniaid paidbah bad sa bat tnga jubor, da ki riew pohjait, ha ka sngi, jong ka 4tarik Jymmang 2023 bad nangta sa ka Mizo Students Union (MSU), ka la rai ba kan leit ban shim jingkhein ia ka jingdon jong ki Mizo, ha ki jaka pule bapher jong ka Mizoram.

Mynta ka sorkar Manipur, ka la pynkhreh, ban leit shaw noh ia kitei ki jaitbynriew Meitei, ong ka khubor.
Ki pulit jong ka Mizoram, ki la pynkhlain bha, ka jingpahara ia ki Meitei, kiba don ha ka nongbah Aizawl, kaba kynthup ha Vety College, Selesih; Mizoram University, Tanhril; RIPANS, Zemabawk bad ha ZMC, Falkawn.

Hynnin ka sngi saitjain, ki la don 65ngut ki Meitei, kiba la mih noh ha Mizoram ban leit phai sha Manipur, ong ka khubor. Ki Meitei, ki don 53 percent jong ka jingdon briew ha Manipur bad ki shong ki sah ha ki them jong ka Imphal, katba ki trai shnong, kiba kynthup ia ki Naga ad ki Kuki, ki don 40 percent bad kitei ki shong, ha ki jaka lum jong ka jylla Manipur.