Pyntip U Rahul, halor ka jingjia kaba sngewngiew ia u bad ka kmie, ba ki leit poi sha Bhopal

Hynnin ka sngi, U Rahul Gandhi, u iathuh, halor ka jingjia ba ngiew, kaba la jia ia u bad ia ka kmie jongu, ka Sonia Gandhi bad kaba la pynlong ia ki, ba kin leit hiar khyndew kyrkieh sha ka nongbah Bhopal, jong ka Madhya Pradesh.

Ha ka jingthoh jong U Rahul Gandhi, u ai jingiaroh, ia ka kmie jongu, kaba 76 snem ka rta, ba ka long kaba jai jai ka jingmut jingpyrkhat jongka, wat la ka don ha ka khyllipmat jong ka jingeh “epitome of grace under pressure.”

U Rahul, ula pyni, ia ka dur, kaba la shon ia ka Sonia Gandhi, ha kaba ka don hapoh ka liengsuin bad ba ka deng da ka oxygen mask bad hangtag, u thoh “Ma, the epitome of grace under pressure.”

Katei ka dei ka dur, kaba don hapoh liengsuin, ha kaba kitei ki arngut, ki dang leit phai na Bengaluru sha Delhi, hadien, ba ki don ha katei ka nongbah, na ka bynta ar sngi, ha ka 17 bad 18tarik Naitung 2023 bad la iathuh, ba ka liengsuin, kaba ki shong, ka hap ban leit hiar kyrkieh sha Bhopal, namar ba ka don jingthut.

Ki arngut shikhun shikmie, ki la leit phai noh sha Delhi, ha ka por 9.30 mynmiet, ha katei hi ka miet, da kaba ki leit da ka liengsuin IndiGo.