Ka por, ka la biang eh, ban ia khlad jylla noh bad ki Garo

La sngewdei ban kyntu jur ia ki para khun-u-Hynniew-Trep baroh phar ban ieng tylli lang baroh ban ai ka jingkyrshan tylli tyllan ia ka jingdawa jong ki Jaintia Durbar na ka bynta ka “Khasi-Jaintia State” lane “Ka Hynniew-Trep State” kaba long ka kyrteng kaba kdup lut ia u Khasi u Pnar (Jaintia), u Bhoi, u War, u Maram bad Lyngngam ia kaba la pdiang da baroh ki Riewstad bad Riewshemphang jong ka jaid bynriew jong ngi kum u Soso Tham bad kiwei kiwei naduh ka por hyndai hynthai ba ka jaid bynriew hynniewtrep bad ki pateng jong ka kin lait noh phar na ka jingshah niewbein bad na ka jingshah longmraw ha kiwei pat ki jaidbynriew kiba kham duna ban ia ngi ha ka liang ka jingbun paid bad ha ka jingnang jingstad.

Kam myntoi shuh kata ka jingdawa ban pynkylla thymmai ia ka bhah thungkam thungjam bad pule puthi namar ngi la iohi shai kdar naduh ba sdang ioh Meghalaya ba ki Garo kim shym la lah ban pyndap wat tang 20% na ka bhah jong ki kaba long 40% hynrei da lei lei ruh kim shah ban pyndap ne thep da ki khun u Hynniewtrep ha ki jaka ba kim lah ban pyndap. Nalor ba kim lah ban pyndap ia kata ka bhah (40%) jong ki haduh mynta mynne ki dawa sa ia kata ka ‘Roster System’ ban khanglad syndon ia ki khun samla Hynniew Trep ban ioh kam ioh jam bad ban ioh leit pule Medical, Engineering bad kiwei kiwei ki lain jingpule. Ngi iohi shai kdar ruh ba ym dei tang ba ngi duh lad ha ka iohkam iohjam bad pule puthi, hynrei ngi duhnong ruh haduh katta katta ha ka liang ka roi ka par namar ba ngi shah teh mraw bad shah synshar ha ki Garo, kumta ki rah lut khoit ia ka spah ka phew jong ka jylla Meghalaya sha Ri lum Garo.

Lano kin sdang ia kata ka Medical College ha Shillong, katba ha Tura ki la jan dep tei. Ka khlein bad dohmet dohkshong baroh ki la rah lut sha Garo, ki ieh ha ngi ki khun u Hynniewtrep tang ka dohshyieng bad doh satar suda.

Ngi iohi ruh ba kata ka jingdawa ban pynkylla thymmai ia ka bhah thung kam thung jam bad pule puthi kam shym rung sha ki shkor jong ki Garo bad ki da pyrshah tyngeh bad kin nym shah hi ruh lano lano ban pynkylla thymmai ia ka Reservation Policy hapoh ka State Meghalaya katba ngi dang ia don lang ha kajuh ka jylla namar ngi shah synshar bad shah pyniaid ha ki naduh ba sdang ioh Meghalaya. Kumta ka la biang eh ka por ba ki khun u Hynniew trep kin ia tylli mlon ban mih noh sha madan ne sha surok da ki lak lak ngut ban dawa noh da ka Hynniew Trep State kumba la sdang da ka Jaintia Durbar bad dei tang kane ka lad ka ban pynlait phar ia ngi na ki jingeh baroh phar kiba ngi iakynduh naduh ba ioh Meghalaya haduh mynta. Ym dei shuh ban shah shkor ne ailad ia ki Nonglilam bad iingkhong shalyngmat, ki khwan myntoi shimet ba kin pynbiej tang ba kin jop election, ban ioh shuki Minister, bad ban die mraw ia la ka Ri bad ka jaidbynriew lajong. Ki pynkhihwin ia ki paidbah tang shipor shipor khnang ba kin ioh ki envelop kiba heh ba heh na ki Nongialam jong ka jaidbynriew Garo kiba bat bad pyniaid katba ki mon ia ka Sorkar Jylla namar ba ki ieit hok ia la ka jaid bynriew. Shano kata ka Expert’s Committee bad lano kan treikam bad kan neh haduh katno por ne kan shu jah rngai kumba jah bun bun tylli ki Committee ka sorkar u Conrad Sangma kiba shu jah khlem da pyndep ia la ki jong ki kamram. Ki Nongmihkhmat Garo ki ieit ia la ka Ri Garo bad ka jaid bynriew lajong haduh katta katta, namar kata ki thied da ki phew bad spah klur ia ki Nongmihkhmat Hynniew Trep na ka bynta ka jingmyntoi jong ka jaid bynriew lajong. Na ka bynta ka jingmyntoi ka jaid bynriew Garo, ki Nongmihkhmat jong ki baroh 24 ne 25 – 26 ngut katba ki don kin ieng tylli kawei khlem khein la ki don ha kano kano ka Party lane la ki don ha ka liang synshar ne liang pyrshah na ka bynta ka jingmyntoi jong ka jaid bynriew lajong ki ia long kawei.

Ka Jylla Meghalaya ka la palat ia ka 50 snem ha kaba ngi iadon lang ma ngi ki khun u Hynniew Trep bad ka jaid bynriew Achik ne Garo kiba don bun ki jingiapher ha ka Riti-Dustur bad kiwei kiwei ki rukom. Kum ki jaid bynriew Riewlum jong ka North East India ngi la don hapoh ka sorkar Assam tang kumba 20 snem tam ei ei bad dei tang namar ba ka sorkar Assam ka thmu ban pynrung ia ka ktien Assamese hapoh ki Ophis bad jaka treikam ha ka Sorkar baroh ba sa ieng tylli ki paidbah Hynniew Trep ban ioh la ka jong ka Jylla ba kyrpang ka long pynban kumba ong, “Na ka Nar ha u Dek”. Ngi iohi mynta ba ki Garo ki ialeh ban pynkylla ia ki bynta ka Bri u Hynniew Trep sha ka Rilum Garo. Bun bun ruh ki longkmie Hynniew Trep kiba shong kurim ia ki shynrang Garo ki hap ban kylla jaid Garo noh ha ryngkat bad ki khun ki kti jong ki. Ngi iohi ruh ba la bun ki Assembly Constituency kiba don hapoh ka Bri u Hynniew Trep la wan ialeh election da ki jaid bynriew Garo bad la don ruh kiba jop bad long MLA ne Nongmihkhmat da ki Garo hapoh ka Bri u Hynniew Trep ngim dei shuh ban iaid matlah, ngi la dei ban kyndit thiah noh ym ban shah kynoi shuh ha ki Nonglilam bad ki Nongdie mraw ia la ka Ri bad ka jaid bynriew baieit jong ngi. Kaei kaba la leh bakla da ki Nongmihkhmat Hynniew Trep ha ka por ba ioh ia ka Jylla Meghalaya, ngi dei ban pynbeit mynta mar mar ym dei shuh ban dang buhteng.

Ngi iohi ruh ba ym dei tang ki Jylla Riewlum kum ki Naga, Mizoram, Meghalaya bad kiwei kiwei kiba pait na ka Jylla Assam hynrei bun bun ki Jylla shapoh ka Metbah India ruh kiba pait bad mih ar ne lai tylli tang ha kawei ka Jylla kaba rim. Kumta ka por ka la biang bha ia ka Jylla Meghalaya ban pait ne phiah noh sha ki Ar tylli ki Jylla kata sha ka Hynniew Trep State bad Achik/Garo State. Kynmaw ko ki khun u Hynniew Trep ba katba ngi dang sah lang bad ki jaidbynriew Garo, ka jaidbynriew Hynniew Trep jong ngi ka nang ring sdot bad im jyllai jyrwit namar ngim shym ioh ia ki Nongialam jaid bynriew, ngi dang ioh tang ki Nonglilam Ri bad jaidbynriew naduh ba ioh Meghalaya haduh mynta katba ka jaidbynrew Garo pat naduh ba sdang haduh mynta ka ioh da ki nongialam kiba paka bad ba da ieit shisha ia la ka Ri bad ka jaidbynriew lajong. Lada kum ka jaidbynriew Hynniew Trep kaba shah synshar ha ka jaid bynriew Assamese tang kumba 20 snem tam ei ei balei ngin shah synshar pat ha ka jaidbynriew Garo da palat 50 snem ei ei. Ngi la dei ban kyndit bynriew noh ban ieng ialeh kloi noh bran bran ban ioh da la ka jong ka jylla Hynniew Trep ym dei shuh ban buh teng ne pynslem ieng joit noh mynta mynta namar katba nang slem ngin nang ngam bad nang hap ha ka jingjynjar trah. Ynda la ioh ia ka Jylla Hynniew Trep lajong ngi dei ruh ban kynmaw shuwa ia u pud u sam uba biang katkum ba la buh bad la pruid dak da u Ni u Kong bad ki kpa tymmen naduh hyndai hynthai. Ngim dei ban duh ei wat tang shi ksai ne shi in chi ka jaka ne khyndew ka shyiap jong ngi. Kumjuh ruh ynda la ioh ka jylla lajong ngi dei ban pyrthuh bud ia ka rukom jong ki Manipur (Kuki) ba yn nym shah ban pynrung Schedule Tribe ia kano kano ka jaid bynriew bym dei Hynniew Trep hapoh ka jylla Hynniew Trep jong ngi bad ngim dei ruh ban ailad ia ki ban ieng ialeh election napoh ka Bri u Hynniew Trep jong ngi, kino kino ki bym dei ki khun u Hynniew Trep haba ki shong ki sah hapoh ka Bri u Hynniew Trep kim dei ban long trai ne long kynrad kin dei beit tang ki nongbylla bad nongtrei jong ngi.

Ha ka liang u pud u sam mynta katba ngi dang iadon lang hapoh ka Jylla Meghalaya ngim dei shuh ban shah ia u Conrad ne iano iano ban pynbeit katba ki mon ma ki, lada don mano mano ba tam pud ne kyntur pud, dei ban pyrthuh bud ia ki jait bynriew Naga bad Mizo ban ialeh ia la ka jong ka hok ym dei shuh ban shu ia bun tang ka ktien la dei ban leh beit beit da ka kam shlur kumba leh ki Naga bad Mizo.
M.S. Ryngksai,
Dawki / Lummawbah.