“Ka Pateng bynriew”

AIS Suja

Ka pateng bynriew Israel. U Jisu u ong – “Kane ka pateng bynriew kan ym leit noh, tad ynda la pyndep, ia kiei kiei baroh” Mathaios 24:34. Ka mut aiu kane ka jingong u Jisu? U Jisu u ong ba ka Israel ka dei kum uta u Dieng dumbur uba khielung ha shwa ka Lyiur. Mathaios 24:32. Ka jingkhielung ka dei ka jingwan pat ki Israel (Jiw) na kylleng ka pyrthei sha ka ri lajong, ka ri Israel, ha kaba ka la ioh pat ia la ka ri sa shisien ha u snem 1948 A.D. kane kein ka dei kata ka por ka jingkhielung u Diengdumbur (Israel).

U Jisu u ong ba kane ka pateng kan ym leit noh ne jah noh na kane ka sla pyrthei tad ynda la pyndep ia kiei kiei baroh. Shaphang ka jaidbynriew Israel la leh bein da kiba bun ki ri ki hima jingsynshar Jentil naduh ki spah snem ba mynshuwa, khamtam ki Arab Middle East.

Ha u snem 1957 A.D.ki Arab ki ong – Ngin ym shongthait tad ynda ngin iohi ia ka jingkyllon ki Jiw. Ha u 1967 AD ka Egypt ong – Lada ka thma ka khie bad ka Israel, yn ialeh beit bad ka jingthmu ka long beit ban pynduh pyndam ia ka Israel. Ha u snem 1939 AD – 1945 AD, ka la jia ka thma bah pyrthei ba ar (Second World War). Ha kane ka thma u Adolf Hitler u la pynmih hukum ba dei ban pyniap lut ia ki Israel ym dei ban pynsah symbai iwei ruh, kumta la pyniap haduh 60 lak ngut ki Israel. Watla katta ruh u Blei u dang ri dang pynsah symbai ia ki khun Israel bad ngi iohi ba ki la bun paid ha kine ki sngi.

Ka don ka jingshun kaba khraw ia ki Israel kum ka jaid bynriew naduh kaba sdang hi. Ka ktien u Blei ka iathuh ka ong – “Ki la ong ia ngin ia pynduh noh ia ki (Israel) ba kin ym long ka jaidbynriew, ba ia ka kyrteng Israel yn ym kynmaw shuh” Salm 83:4. Wat mynta ruh ka pyrthei bad ki ri Arab ki iai p yrshang, hynrei ym don lad satia ia ki, namar ba kane ka jaidbynriew ka dei ban neh tad haduh ka jingwan pat u Jisu sa shisien sha kane ka pyrthei.
Ka pateng ki Israel kan ym jah na sla pyrthei namar u Blei u la kren “Kan ym leit noh tad ynda la pyndep ia kiei kiei baroh”. Kiei kiei baroh ki long ki jingjia ba la dep jia, kiba mynta bad ki ban sa wan. Mynta u Blei u la lum pat ia ki naduh u 1948 haduh kane ka sngi kaba long 75 snem.

Ka jaid bynriew Israel ka la long well develop ne ka la roi bha khamtam ha ka liang ki tiar thma science & Technology ka juk mynta. Ka daw ka long ba u Blei u la pyllong ia ka ha ki sngi ban sawan – kum ka Atiar thma jong u. “Ong u Blei ia ki Israel – PHA LONG U SDIE IAPOM BAD KI ATIAR IALEH THMA – JONG NGA: DA PHA NGAN PYNLWET IA KI JAIDBYNREW” Jeremaiah 51:20.

Ka Israel mynta ka la biang ki tiar thma kum ki suloi, ki Tank ki Robot, ki Iron Dome, Iron Beam, ki Jet thma ba shyrkhei bad kiwei. Ka don ki shipai (IDF) kiba triem. Ka Israel ka dang neh kum ka jaidbynriew namar ka hap ban ialeh ia ka thma kaba shyrkhei ha ki por ban wan hadien ka jingieng pat ia ka Temple kaba lai (Third Temple) ha Jerusalem. Bad kan sa ialeh ruh ia ka Thma Armageddon kumta kane ka pateng bynriew Israel kan neh haduh ka por ka jingsynshar u Mrad khlaw, ka thma Armageddon, haduh ki por ba u Jisu un wan hiar halor u lum ki Olib (Mount of Olives). Dei hangta, yn pyndep lut ia kiei kiei baroh ba la thoh ha ka ktien u Blei. Namar ba ka bneng bad ka khyndew kin leit noh (duh noh) hynrei ki ktien jong nga kin ym leit noh satia. Mathaios 24:35.