Kynduh MR ki MLA NPP, lem bad ki nongkitkam ka Party na Bhoi

Nongpoh:Arngut ki MLA ka NPP na Ri Bhoi, kiba kynthup ia u Bah Sosthenes Sohtun, MLA Jirang, nangta u Bah Damanbait Lamare, MLA Umroi, ha ryngkat ka jingdon kiwei pat ki nongialam ka NPP na ki jaka bapher bapher ha Ri Bhoi, mynhynnin ka sngi ki la leit ban kynduh ia u Conrad K. Sangma, Myntri Rangbah ka sorkar jylla, na ka bynta ban iakren halor shibun ki kam pynroi kiba iadei ha Ri Bhoi.

Lyngba jong katei ka sngi, ba ki la leit ban kynduh ia u Conrad K. Sangma, kitei ki nongmihkhmat na ka NPP lem bad ki nongialam, ki la pynsngew hakhmat u Myntri Rangbah, ba ki don shibun ki shnong bad ki jaka ha Ri Bhoi, ba ki paidbah ki dang donkam ia shibun ki kam pynroi ha ki shnong ki thaw.

Haba kitei ki nongmihkhmat ka NPP na Ri Bhoi lem bad ki nongkitkam, ki la ioh ban pynsngew hakhmat u Conrad K. Sangma, na ka liang u Myntri Rangbah, u la ai ka jingkular ba un sa pyrkhat khambha na bynta ki shnong kiba kham sahdien bad kiba donkam ia ki kam pynroi ha Ri Bhoi.