Lynniar uba duk, ba khang dukan 10baje

Ka rukom treikam ka ain, ka kanun, ha Meghalaya, la iohi, kumba ka iaid da khongpong ha kine ki sngi bad kata ka long, ba ka sorkar, ka leit tuklar lut, ia ka kamai kajih bad ka leit ka wan jong ki riew paidbah.

Lyngba ka hukum jong ka Deputy Commissioner, East Khasi hills, ban khang dukan ha ka por 10baje mynmiet, la iohi, ba mynta, ka la ktah pynban ia ka pla jong ki duk ki rangli, kiba die madan, kiba die sha, kiba die waidong bad kiba don ia ki kam kiba rit ba ria, kiba kamai mynsngi bad bam noh mynmiet.

Katei ka hukum, ka la pynmih ia ka jingialeh pyrshah jong ki nongdie ja, ki nongdie sha ha Khyndailad, ha kaba ki la nud ban ia pyni bor bad ki pulit, kiba leit ban pynbor, ba kin bat, ia ka hukum jong ki bor District bad ka dei hangtei kein, ba ka wan ka kyntien, kaba ju ong, ba haba dung kura u khaw lane ba ka banse ka thom ia ka sang bad kitei ki nongdie madan ruh, ki dei kiba ri khunrei, kiba duk, kiba shong ha ki iingwai bad kiba shaniah beit tang na katei ka jingkamai shibeit bad lada knieh noh, ia katei ka jingtrei jongki, kumta, ngi hap ban sngewthuh, ba naei pat, kin ioh ban pynkdang ia la ka kpoh.

Kane ka jait hukum, kam ktah satia ia ki shakri sorkar, kiba leit phai iing, dang 5 baje nohsngi, ia ki heh spah, kiba ia dih jah thait ha ki bar kiba heh ba heh, hynrei ka ktah ia kiba die madan, kiba leit trei shajngai, ki nongniah kali bad wat ia ki nongshangkai pyrthei, kiba leit shang kylleng ka Ri Khasi bad sa wan phai sha Shillong, ynda la miet bad lada kane ka hukum, ka iai bteng, kumta, kin bun kiba leit phai sahmiet noh sha Guwahati.

Ka sorkar jylla, ka la dei ban mait noh mardor ia katei ka hukum, namar ka dei tang ka kam pyntieng briew, ka kam pynsyier mynsiem ia ki nongleit nongwan bad ka dei ruh pynban, ka jingplie lad ia ki nongtuh, ki nonglute, ba kin iaid sahuh, khamtam, ha kum kine ki sngi, ba ka don ka jinglip ding, kaba baroh shimiet.

Kam dei tang katta, hynrei, lada ka Shillong, kaba dei ka nongbah jong ka jylla bad kaba don lut ia ki tnat ophis sorkar bad kaba ki heh pulit, ki shong ki sah, kan dang don ha ka jingshong syier, kumta katno tam, ia ki shnong nongkyndong, ki bym ju don pulit pahara bad ha kane ka rukom, ka la dei kein, ia kitei lei kiba pli, ba kin shu phnieng da u diengshan baroh shisngi shimiet bad ia khang ia ki dukan, ia ka leit ka wan, tang shu la sep ka sngi.