Nga shimet, ngam sngew eiei, ba kan wan ka rel, ong U MP

Shillong:Haba pynpaw ba ka long kaba donkam ban iada ialade kum ki riewlum, ha kajuh ka por, u MP ka Shillong u bah Vincent H Pala u la ong ba ka long kaba donkam ban iaid katkum ka jingkylla jong kane ka juk mynta.

Ia kane, u bah Pala u la kren halor ka jingkylli ia ka jingsngew jong u ban wanrah ia ka lynti rel sha kane ka jylla khamtam sha East Jaintia Hills ha kaba ki sengbhalang ki la pyrshah jur.

U bah Pala u la ong ba ka sorkar ka donkam ban pule bniah haduh katno ka jingshyrkhei ka jingwan ki briew nabar bad haduh katno kum ka jaitbynriew ka donkam ia ki kam pynroi bad kyrmen ba ka sorkar kan leh ia kane.
“Nga shimet, ngam sngew eiei ba kan wan ka lynti rel lada peit ia ki jingdonkam ki kam pynroi ha ka jylla, ki jingioh kam ioh jam, ka jingkiew dor ki mar ki mata hynrei haba peit ia ka jaitbynriew kaba rit, ka donkam ban don ka jingiada”, u la ong.

Haba pynpaw ba um sngew eiei ban pyrshah ban wan ka lynti rel, u bah Pala u la ong ba ka surok kam lah shuh ban shan na ka jingiaid ki kali heh ban kit jingkit bad lada kan wan ka lynti rel kan iarap shibun. U la ong ba ha ka shi sngi, kumba 3300 lak ton la shalan jingkit da ki kali ha ka shi sngi ia ka dewbilat bad kumba 50 lak ton la kit mar tang na Jaintia Hills sha kiwei ki jylla bad na kane ka daw, kan long kaba eh ban pynbha ia ki surok bad lada don ka lynti kan kham suk ka leit ka wan bad yn kham ioh ia ki mar ki mata kiba tad.

U la ong shuh ba ha jylla Meghalaya u don u mawshun bad u dewiong ba bha tam ka jinglong bad ki kompeni bapher bapher kin sa wan tuid ban seng ha kane ka jylla ha kaba kan wan ki kam pynroi hynrei kam mut pat ban shu pynlait laitlan bad ka donkam ban iada ialade kum ka jaitbynriew kaba rit. “Ngi don u mawshun ba bun tam ha East bad u dewiong ba bha tam ha ka pyrthei, ki kompeni bapher bapher kin wan ban seng ia ki karkhana bad kane ka donkam ia ki kam pynroi, ka ioh kam ioh jam”, la ong u bah Pala.

“Kum u nongmihkhmat paidbah nga hap ban kren ban pynpaw hynrei kam mut ba ngim donkam ban iada kum ka jaitbynriew kaba rit, ngi donkam ban iada, kumba la pynpaw ki sengbhalang namar ba ngi lah ban shah knieh ia ki kam bad kan wanrah ia ka jingbuhai shnong kiwei”, la ong u MP ka Shillong.