1,200ngut ki nonghikai, yn thung ha ki Primary skul, ong u myntri

Shillong:U myntri ka tnad pule puthi ka jylla ha ka sngi Nyngkong, u la ong ba ka jylla Meghalaya ka la leh bha ha kine ki lai snem ba la dep ha ka pule puthi ha kaba ka la kham tam wat ia ka jylla Kerala kaba la kiew bha ha ka thoh ka pule ha ka ri.

U la ong ba katkum ka jingpynhap kyrdan jong ki jylla ha ka ri ne ka Performance Grade Index (PGI), ka jylla Meghalaya ka la kiew sha ka 2017, ka don ha ka kyrdan ba 8 hynrei ha 2020-21, ka kiew sha ka kyrdan ba hynriew. U la ong ba ka jinglong jingman ka pule puthi ka la kiew ha kine ki saw snem. Ha u snem 2017-18 bad bad 2018-19, ka Kerala ka ioh 826 point bad ha 2019 ka ioh 862 point kaba kiew sha ka 36 point katba ka Meghalaya ha kine ki snem ka 574 bad ha u snem 2019 ka kiew sha ka 610 point bad ka kiew sha ka 36. Ha u snem 2019-20, ka Kerala ka ioh 862 point ka kiew 29 point katba ka Meghalaya ka kiew 629 point bad ka kiew sha ka 29 point, bad kane ka la pyni ba ka jingkiew ka jylla Meghalaya ka iaryngkat bad ka Kerela.

Ha u snem 2021 ka Meghalaya ka kiew sha ka 716 ka la kiew sha ka 69 point ban kham palat ka jingioh point ia ka Kerela.
Ka jingshim jingkhein halor kane ka dei lyngba ka jingdon ki lynti syngkieng kiba biang, ki tower phah khubor bad kiwei ki jingdonkam jong ki jaka pule kum ka ïing skul bad kiwei.

Ha kajuh ka por, u myntri u la pyntip ba ka tnad kan pynlong noh ia ka jingthungkam ia baroh 1200 tylli ki kam kiba lait ha ki Primary Skul ha ka jylla bad ia kane yn shim interbiw ia kito kiba la dep pyndep ia ka MTET.
Haba pyntip halor kane, u Rakkam u la ong ba ka sorkar kala rai ban pynmih noh ia ka jingpynbna halor kane mynta u bnai hi bad kiba lah ban aplai kin dei tang kito kiba pass ia ka MTET bad u la ong ba lada kan slem ruh kam ym palat ia ka ar bnai.

Ha kajuh ka por, u la ong ba ka sorkar ka la pynkhreh ban ai jinghikai ia ki nonghikai da kaba iatreilang bad ka IGNOU, NIOS lyngba ka jingiarap ka sorkar India.
U la iathuh ruh ba ka sorkar India ka la mynjur ban buh ia ka jaka ialeh ia ka eksamin Common University Entrance Test (CUET) ha Shillong, Jowai bad ha Tura ha sienjam ialeh ban wan khnang ban pynlait ia ki samla na ki jingeh.

U la iathuh ba dang shen hapoh ka jingialam u Myntri Rangbah ka jylla u Conrad K Sangma, la iakynduh ia u myntri ka tnad pule puthi ka ri ha New Delhi, ha kaba u myntri u la kular ban phah ia ki ophisar ban wan iamir jingmur bad ki ophisar ka sorkar jylla shen ban sngewthuh ia ka jinglong jingman ka jylla.
Ha ka jingiakynduh bad u myntri, la iakren ia ka kam nonghikai SSA, ka skulbah ha ka jylla, ka PMUSA, bad kiwei ki mat.