Kiew dor u synsar sha ka T.90 shi kilo, ha Iew Dielang Mawiong

Shillong, 28 Nailur:
Ka dor jong u synsar ka la  kham kiew mynta ha iew dielang ha Mawiong, la kumba ar bnai lai bnai mynta. Kham mynshwa ka dor jong u synsar uba kham bha ka long T. 85 shi kilo katba mynta ka la kiew sha ka T.90 shi kilo.
Haba u Rupang u la ioh ban iakren bad u malik synsar ha katei ka iew, la iathuh ba ka dor jong u synsar ka shong kat kum ki mar rep. Kiba kham bha ki kham remdor bad ki synsar kiba duna ka jingbha, ka dor ruh ka kham duna.
U la ong, ia ki synsar la wanrah na kylleng kylleng ka ri Khasi Jaintia bad don ki thain kiba pynmih ia u synsar ba kham bha ka dor ruh ka la kham rem.
Ia u synsar la thied ha la ki jong ki jong ki dor. U Synsar u ba shi nombor u shongdor haduh T.90 shi kilo bad u ba ar nombor u shongdor haduh 80 tyngka shi kilo. Katkum ka jingiathuh jong une u Marwari la ong ba ki synsar ki ba kham bha la ju kham pynmih na kum ki thain Jirang na ri Ri Bhoi District,Mawsynram, Balat, Synteng, Lawbah na East Khasi Hills bad na Jaintia Hills.Katkum ka jingiathuh u malik, la ong ba u synsar ba kham bha ba ju wan poi sha kane ka iew dielang u dei na ka thain Jaintia Hills, Balat, Pynursla, Shella bad ruh na thain Ri-Bhoi.Ia kine ki synsar, la ju shalan sha baroh kawei ka ri India namar ka jingdawa synsar ka jur bha, namar ba ha kiwei ki jylla jong ka ri India ym ju mih synsar lait noh tang ha Meghalaya.
Katba haba iakren ba katto katne ki malik phan, ki la iathuh ba ka dor jong u phan teng teng  ka kiew teng ka hiar namar ka shong katkum ka iew ka hat. Lada jur ka jingdawa u phan ruh u kham kiew dor.
La iathuh ba ka dor jong u phan ba kham heh mynta ka la long T. 1050 shi kwintal, u phan ba kham pdeng ka long T.700 shi kwintal bad u phan ba kham rit u shong dor T. 350  shi kwintal.
” Hangne ha iew ha ka shi sngi sngi ju pynhap phan kumba 20 trok eiei”, la ong u malik die phan ha Iew Dielang.Ha ka jingiakren bad uwei kharkaia ba ju thied phan u la iathuh ba don bun jait ki phan bad ki phan ki baheh babha lane uba shi nombor la thied ha ka dor T.10.50 shi kilo, uba ar nombor la thied T. 7 shi kilo bad u ba lai nombor pat la thied ha ka dor T.3 shi kilo.Ia kine ki phan la wanrah na kylleng ki thain ka Ri Khasi kum na Lyngiong, Sohiong, Mylliem, Smit, Laitlyngkot bad kiwei kiwei de ki jaka. Ia kine ki phan la ju shalan sha kylleng ki jaka wat sha shabar jylla ruh kum sha Mizoram, Manipur bad ha Assam.
U la ong ba ka jingdawa phan ka kham jur bha kum ha ka thain Mizoram.