“Nga la buaid jawsheh, ngam iohsngew shuh, ba don ba wanjung ianga ruh”

Bhopal:Ka video jong u briew, uba shah synreit umjung ha ka shnong Sidhi jong ka Madhya Pradesh, ka la pynkyndit ia ka Ri hi baroh kawei bad katei ka la pynlong ia ki pulit, ba kin kem ia U Pravesh Shukla bad pynhap ia u, ha ka kyndon National Security Act (NSA) bad sa ka iing jongu, kaba la shah pynpra. Ym tang katta, u Shivraj Chouhan, myntri rangbah ka jylla, ula sait ruh ia ki kjat jong utei u jait bynriew tribal, U Dashmat Rawat.

Mynta pat, ka la mih sa kawei ka jingkynnoh bad kata ka long ba u Shivraj Chouhan, um shym la sait satia ia ka kjat jong utei uba shah shoh, hynrei, u leit sait da ka kjat jong uwei pat, uba ki khot kyrteng U Sudama bad utei um dei satia, uba shah kynshait umjung. La iathuh ba utei uba shah kynshait umjung, u dei uba dang kumba 16 lane 17 snem, katba utei uba shah pynsait kjat, u dei uba don kumba 35 haduh 38 snem ka rta.

U Superintendent of Police (SP) jong ka Sidhi, u Ravindra Kumar Verma, u iathuh ba u dei shisha U Dashmat Rawat, uba shah pynsait kjat, ha u myntri rangbah, uba na ka shnong Kubri.

Na ka liang jong U Dashmat Rawat pat, haba la kylli, u iathuh “Kane ka jingjia ka la jia ha u snem 2020 bad nga la buaid jawsheh bad ngam iohsngew shuh, ba don ba wan jung ia nga ruh bad ngam ithuh hi ruh, ia u nongjung. Ynda ka la mih katei ka video, la ialam ia nga sha thanat bad kumjuh sha ophis jong u collector bad nga la shu thok ia ki bor pulit, ba ngam dei satia, ma nga uba la shah jung, hynrei, ynda haba u nongjung, u Pravesh Shukla, ula phla dalade hi, hangta nga sa ngeit ba u dei ma u, uba leh kumta”.