Yn pan ka KHADC na u Lat ban pynkiew khajna

Shillong, 28 Nailur:
Ka KHADC ka la rai ba kan thoh sha u Lat ka jylla u  V Shanmuga nathan ba un pynkiew ia ka bhah na khajna na ki mar poh khyndew ba dei jong ka Council sha ka 60 percent  na baroh kiba dei ban ioh bhah ka Council.
“Ngi la aiti ia kane ka kam ha u EM  ban peit ia ka Mines bad Minerals bad u EM ba peit ia ka pla tyngka ban pynkhreh ia ki jingdonkam shwa ban leit aiti ha u Lat ka jylla ba un pynkiew ia ka jingioh khajna jong ka Council sha ka 60 percent,” la ong u CEM ka KHADC Bah Pynshngaiñ N Syiem hynne ka sngi.
U la ong ba ka bhah jong ki mar poh khyndew ka long  tang  40 percent ba ka Council ka ioh na ka sorkar jylla.
‘Hynrei ka sorkar jylla ka la pynduna ia ka khajna jong ka Council na ka 40 percent sha ka 25 percent,” la ong u Bah Syiem.
Katkum ka jingong u Bah Syiem ka jingpynkiew ia ka khajna ka long ban iarap ia ka Council ban pyndep ia ki kam ba man ka sngi.