Shah thang kali, ha khmat ka thanat ki pulit ha Laitumkhrah

Shillong: Hynnin ka miet, ka la don ka jingshah thang jong kumba 2 lane 3 tylli ki kali, kiba ieng ha khmat jong ka thanat ki pulit ha Laitumkhrah bad katei ka jingjia, ka leit jia, hadien ba ka la don ka jingshah shoh jong ki samla Khasi, ha khmat ka ophis U DHS, ha Laitumkhrah.

Hadien katei ka jingjia, la leit ai ejahar ha ki pulit jong ka Laitumkhrah, hynrei, la iathuh ba ki pulit, kim shym la pdiang ia ejahar bad dei hangta, ba ka la mih ka jing ia kawang ktien hapdeng ki riew paidbah bad ki pulit bad kam dei tang katta, katei ka jingbitar, ka la pynlong ruh ia ki riew paidbah, ba kin kawang maw ia katei ka thanat pulit ha Laitumkhrah bad la iathuh ruh, ba ka don ka jingshah bom ki samla Khasi, ha ka por jong katei ka jing ia kawang maw, ha ka por kumba shiteng synnia hynnin ka miet.