Pynlait ki briew, ia u rangbah ba thmu noh iap ha pung Umiam

Nongpoh: Ka tyllong khubor kaba la iohlum, la ong ba la don uwei u rangbah na ka shnong Umsamlem, Ri Bhoi, u la pyrshang ban nohiap ialade hapoh ka Pung Umiam, hynrei katei ka jingthmu jong u, ka la pulom noh, namar la wanlap kloi noh da ki paidbah kiba don ha katei ka jaka.

Ka jingtip kaba la iohlum, la ong ba katei ka jingjia ka la jia mynta ka sngi ha ka por 12 baje eiei, ha kaba la don ki riew paidbah kiba la iohi ia u ba u la iaid lamwir harud ka pung Umiam, hynrei ha ka por ba u thmu nohiap ki paidbah ki la iohi ia u bad ki la iohbat hashwa ba un nohiap ha katei ka Pung Umiam.

Hadien ba la ioh pynlait ia u tei u briew, la aiti noh sha ki bor ka Umiam Police Station bad hadien ka jingpyntip sha ki bahaiing la wanshaw noh ia u da ki bahaiing.