Dei kane kein, ba ki ong “Ka khmat namar ka khmat” namar ka khmat jong u blang, ka pyniap ei ia u briew

Ka dei hangne kein, ba ka la urlong shisha, ka jingong “Ka khmat, namar ka khmat” bad kane ka dei ka jingjia, kaba jia ha Surajpur District, jong ka jylla Chhattisgarh.

U Bagar Sai, uba don 50 snem ka rta, na Surajpur district jong ka Chhattisgarh, ula thied khnang ia uwei u blang, ha kaba ula leit ai kum ka jingknia ha kawei ka temple. Hadien ka jing ai burom sha ka temple, U Sai, ula kmen shikatdei eh, ba ula lah ban pynurlong, ia ka jingkwah kaba la slem bha jongu ban ai jingknia ha katei ka temple bad kumta, ki la ia ot doh bad shet bang bha, ban ia bam khawai ia utei u blang, ha ka shnong Khopa Dham, kaba hajan Madanpur, ha ka sngi U Blei.

Ka jingkhawai, ka la long kaba shongshit bha, ha kaba ki la iabun kiba ia bam shngiam, ia katei ka jyntah kaba la shet bang bha, na utei u blang shynrang; hynrei na ka bynta U Bagar, ula jied khnang ban bam da ka khmat jong utei u blang, uba la shet lang ha katei ka doh khawai. Mar ia nguid ia katei ka khmat blang, um shym la ioh lad satia ban ktha ia katei ka khmat blang bad ula kum nguid noh shapoh bad mar kumta, ka khmat jong u blang, ka sahkut ha u pdot jongu. La pyrshang ia bun ki lad ban pyllait ia katei ka jingsahkut ka khmat blang, hynrei, ha bym lah satia bad ba ula shitom jur ban ring bad pynhiar mynsiem, kumta la leit rah mar mar sha hospital, hynrei ka jingleit rah ka la slem palat bad U Bagar, ula khlad noh shen hi, kumba u shah pyniap u blang.