Hiar Ummat u CEM bad ki EM ka KHADC, ban peit Law Kyntang

Nongpoh: U Bah Pyniaid Sing Syiem, CEM ka KHADC, ha ryngkat ka jingdon kiwei ki heh hapoh ka KHADC, kiba kynthup ïa u Bah Pynshngain N. Syiem, Dy. CEM, nangta u Bah Charles, Marngar, MLA Mawhati bad uba dei ruh u Dy. Chairman ha KHADC, mynhynnin ka sngi, ki la leit ban jngoh ïa ka jaka buh shyieng ki 12 Kur kiba don hapoh ka Raid Nongtung bad kaba don hapoh ka shnong Ummat, kaba dei kawei na ki shnong kaba don mynta ha ka jingiapynbeit pud hapdeng ka Meghalaya bad Assam.

Ha katei ka sngi, ba u CEM u la leit ban jurip ia katei ka Mawbah Ki Khadar Kur Nongtung Ummat, la synranlang ruh da u Bah Lamphrang Blah, Chairman ka KHADC, u Bah Rangkynsai Kharbuki, EM, u Bah Teibor Pathaw, EM bad nalorkata la sakhi ruh da ka jingdon u Avijit Kro, MAC jong ka KAAC, ki nongialam ka Raid Nongtung lem bad ki nongialam shnong jong katei ka thain.

Lyngba jong katei ka jingleit jngoh ia katei ka jaka, ki la ioh ruh ban pynlong ia ka jingialang kaba lyngkot hapoh katei ka jaka, ha kaba na ka liang u CEM ka KHADC, u la pynpaw ia ka jingkmen kaba khraw eh ba u la iohlad ban leit jurip ia katei ka bad uba la pynbna ruh, ba kum u CEM un sa pynioh khnang ka jingiarap hapoh katei ka jaka.
Hadien ba la kut ka jingleit jurip ia katei ka Law Kyntang jong kitei ki 12 Kur, ka kynhun kaba la ialam da u CEM, ki la ioh ban pynlong jingialang ha Mawlasnai, ha kaba la ioh ban iashimbynta da baroh ki nongialam shnong hapoh ka Raid Nongtung ne kaba la ju tip kum ka Block-2.

Haba iadei bad katei ka jingiathir jingmut bad kitei ki nongialam shnong, u Bah Pyniaid Sing Syiem, u la ong ba ka la long ka jingiakren kaba seisoh, namar ba ki la ioh jingtip shibun haba iadei bad ka jingeh ki paidbah, kiba dei ruh ki Khasi kiba sah ha katei ka thain khappud.

Lyngba jong katei ka jingkren, ngi la ioh shibun ki jingtip halor katei ka thain bad kumta ia kaei kaba ngi la ioh jingtip, ngin sa iakren bha shuh shuh ha ka Komiti bad hadien kata ngin sa iakren sha ka sorkar, khamtam eh ba katei ka thain Raid Nongtung ne Block-2, ka dang don hapdeng ka jingiakren pynbeit pud hapdeng ka Meghalaya bad Assam.