Yn tuklar mardor, halor ka jingkiew dor ki marbam, ong U MR

Shillong: Mynhynnin ka sngi, u myntri rangbah u Conrad K Sangma u la kren jem ban tuklar mardor halor ka jingkiew dor ki mar ki mata ha iew, hynrei u la ong ba ka jingkiew dor ka shong ha ka iew. U la ai nuksa haba khang dohkha nabar, ka dor dohkha ka kiew bad kane ka dei ka ain jong ka iew ka hat bad ka dor ka mur ka shong ha ka jinglong jingman ka iew.

Lah ban kdew ba dang shen, u MLA ka Gambagre u Saleng A Sangma u la dawa ba ka sorkar ka dei ban tuklar halor ka jingkiew dor ki mar ki mata namar ba ka la ktah ia kiba duk bad kiba duna ka ioh ka kot.
“Ka jingkiew dor ki mar dor, ka dei ka kam ka iew ka hat, don shibun ki daw watla ngi pynthikna ban peitngor ia ka dor ka mur, ban biang ka jingwan ki mar ba kongsan ha iew kan biang”, la ong u Conrad.

U la ong ba ka iew ka shong katkum ka ain jong ka jingjur ka jingdawa bad ka jingdonkam namar haba jur ka jingdawa, ka dor ka kiew. “Kum ka nuksa, haba khang dohkha ban wanrah nabar ba lap dawai Formalin, ka dor ka dohkha ka kiew bad kine ki dei ki jingjia kumba ju long bad nalor kata, ka shong ha ka bor jong ka jinglong jingman ka iew”, la ong u Conrad.