KA GOUT: KA JINGPANG KABA PYNSIEB IA KI MAT

Kong L. Kongwang

Ka Gout ka dei ka jingshitom kaba pynlong iaka jingat bad jingpang haki mat, bunsien ki mat jongki kjat kmie ka shait kham pynshitom bha. Ka Gout ka dei ka jingshitom kaba pynlong na ka daw baka met ka pynmih shibun ki chemical bala tip kum ka uric acid,bad pynlong ia ka jingat ha ki mat.
Ka Gout ka dei hi ka jait jingpang arthritis bad kaba pynlong iaka jingtyrha hakine ki mat, bunsien ka pynshitom bad ktah bha iaka mat jong ka kjat kmie, hynrei ka lah hi ban pynshitom ia kiwei kiwei ki bynta ruh kynthup iaka khongdong, ki khohsiew, ki kti, ki tymbuit bad ksangkti. Kane ka jingpang ka ktah tang shibynta ia ki mat ha ka met jong ki briew hynrei don teng teng ba ki lah ruh ban pynshitom lang sha ki wei kiwei ki bynta jong ka met. Bad kane ka jingpang ka ktah iaki briew kiba la kham tymmen bad noh ka rta. Phi lah ban mad ia kane ka jait jingshitom tang shisien haka jingim jongphi bad ka lah ban shu jah kumto khlem donkam jingsumar. Ka jingshah pynshitom ha kane ka jingpang ka lah ban neh tang kumba 15 sngi eiei.

KI DAK KI SHIN JONG KANE KA JINGSHITOM: Ki dak ki shin ba nyngkong eh ban paw na kito ki jaka ba shahktah bad pynshitom ki long kine harum:

1. Ka jingktha kynsan kynsan bad pang eh bha.
2. Ka jingat bad saw hakito ki jaka ba kane ka jingpang ka shong.
3. Ka sniehdoh ka saw bad phyrnai bha kaba lah ban khoh ha dien katto katne por.
4. Phi lah ruh ban don jingshit.

KI JINGEH KIBA LAH BAN MIH NAKA DAW KANE KA JINGSHITOM : Ka jingeh kaba lah ban mih naka daw kane ka jingshitom ka long baka nangpynshitom bad pynpang shuh shuh iaki mat. Bad kane lehse ka lah ban neh haduh hadien habud haduh ka jing anna noh jongki mat.

KIWEI KIWEI KI JINGEH KI KYNTHUP IA KINE HARUM
KA JINGDON MAW HAKI KHYLLAI :Kane ka lah ban long haki arngut naki 10 ngut kiba don iakane ka jingshitom. Kalah ruh ban poi shaduh ba u khyllai u duh noh. Ka jingdon iakane ka jingshitom ka lah ruh ban pynioh pang Cardiovascular disease ne ki jingpang kiba iadei bad u klongsnam (kum kaba ioh stroke bad heart attack). Ka jingbun jongka uric acid haka met jong ki briew ka lah ban buh jingma iaka jingim jong ki briew namar kilah ban ioh bun jait ki jingpang ba ktah ia u klongsnam. Kane ka jingpang lada phi lah ban pynkylla iaki jingmlien ban bam iaki jingbam kiba lah ban pynmih shibun ka uric acid bad ka rukom im ban iada la ong phi lah ban lait nakine ki jingeh baroh.

KAEI KA DAW KABA PYNLONG IA KANE KA JINGSHITOM : Phi lah ban ioh iakane ka jingpang lada phi don shibun eh ka uric acid haka met. Ka uric acid ka dei ka kynja khemical kaba baroh nangi ngi don iaka haka snam. Ka dei ka jaboh kaba la pynmih noh naki substance bala tip kum ka Purines. Iakine lah ban shem haki cell kiba don haka met jongngi, bad ngi lah ruh ban shem iakine haki katto katne ki jingbam kum ki jingbam kiba ioh na duriaw. Iaka uric acid la pynlong naka jingshah pynpra noh jong ki jingbam. Ki lah ruh ban mih haba ka met ka pynpra noh ia ki cells kiba rim bad thaw thymmai da kiwei lada kane ka acid kala bun palat ka leit noh sha ki khyllai bad pynmih shabar haka um pynjhieh.
La ong ba ka jingkiew jong ka uric acid, ha ka snam ka lah ban long lada ki khyllai kim lah ban pynmih ne pyniaid kloi kloi iakane ka acid sha ka um pynjhieh.
Ka met jong ki briew ka pynmih shibun ka uric acid ne ba iaki jingbam kiba riewspah ka jingdon iakine ki Purine. Lada kane ka acid ka jur ban don bun haka met jongphi, ka lah ban pynlong iaki crystal ne ki maw kiba lieh barit barit haki dohstang ne tissue. Bad kine kine ki jaka ki long kum haki mat bad kane ka pynlong iaka jingat bad jingsieb ki mat.
Phi lah ban don bun iaka uric acid haka met, hynrei phim don iakane ka jingpang. Ka long kaba lyngngoh baki don ki briew kiba ioh iane ka jingshitom bad don ki wei pat ki bymdon. Hynrei ki don katto katne ki jinglong kiba lah ban pynlong iaki briew ban ioh iakane ka jingpang. Kum ka nuksa, phi lah ban ioh iakane ka jingshitom lada phi dei ki rangbah briew kiba hap haka rta kaba 30-60 snem shaneng.
Phi dei ki briew kiba bam shibun ki jait jingbam kiba riewspah ka jingdon iaki Purine, Ki briew kiba kyrni iaka kyiad, khamtam ka beer,Ki briew ki bym thikna kino kino ki jingdih ban pynlong iaka met ban tyrkhong, Ki briew kiba dih shibun ki dawai bala tip kumka diuretics( water tablets)ba pynkiew iaka jingsam pynjhieh, Kiba naka iing ka sem kiba don lypa iakane ka jingshitom, ki briew kiba don jingshitom haki khyllai bad pynlong ban nymlah ban pynmih iaka uric acid haka dur jong ka um pynjhieh, Ki briew kiba sngaid bad kiba don jingpang shini, Ki briew kiba don iaka high blood pressure,Ki briew kiba don iaka jingpang proriasis kaba pynlong iaka met jongki ban pynmih shibun ka uric acid haka met.

KI RUKOM SUMAR NA KA BYNTA KANE KA JINGPANG: Ki don bun tylli ki lad bad ki rukom ba lah ban pynduna na kine ki jingpang bad jingat ba la pynlong da kane ka jingpang. Pynaram iaki mat jongphi.Ym dei ban leh kino kino ki kam bormet ne tied ne pyndei hakine ki jaka ba pang. Kine ki jaka ba pang ym dei ban sop, dei ban pynlong pjah .Lada phi buh da u thah hakine ki jaka, ka lah ban iarap shibun. Hynrei dei ban da sop daka jain khnang ban lait naka jingpang ne kynjut kaba tyngkhuh. Phi lah ban dih da u dawai pyllait naki jingktha ne kynjut kum u Paracetamol ne Ibuprofen.
KHUBLEI.