Shillong:U bah Goldenstar Nonglong, uba dei u Secretary jong ka Meghalaya Pradesh Congress Committee (MPCC) u ba dei ruh u kyrtong jong ka parti Congress, na Rambrai Jyrngam constituency ha ka elekshon ba dang shu dep, u la resaiñ kam noh na ka parti Congress bad baroh ki kam kiba u la bat u la iehnoh.
Ha ka shithi ba u la phah sha u President jong ka Meghalaya Pradesh Congress committee (MPCC), u bah Goldenstar Nonglong, u la pynpaw ba hadien ka jingialang ba la long ha ka 24 tarik Jylliew 2023 ha ophis treikam jong ka parti ha Nongbah Shillong, ban ai ka jingkyrshan noh ia ka parti NPP ha Khasi Hills Autonomous District Council (KHADC), kane ka la pynbynniaw, namar ba ki nongrim treikam jong u shimet kam iahap satia, kumta da ka jing sngewkhia kaba jur u la rai ban iehnoh ia ka parti Congress bad resaiñ noh ruh na baroh ki kam ba la bat baroh shi katta ha ka parti naduh mynta ka sngi naduh ka jinglong dkhot ha ka unit, kum u secretary jong ka parti bad kiwei pat ki tnad treikam jong ka parti.
Tang shu ioh jingtip ba ki MDC jong ka parti kin ai ka jingkyrshan ia ka NPP hapoh KHADC, u la pynpaw ka jingpyrshah ba jur, hynrei baroh ki nongialam jong ka parti ki la mynjurlang ban ai jingkyrshan kum ba la rai da ki MDC bad kane ka la pynkyndit, namar ba ka long pyrshah ia ka jing ngeit jong ka parti, ha kaba u la kdew ruh ia ki artylli ki mat kiba pynlong ia u ban pyrshah ia ka rai jong ka parti.
Kawei na kine ki mat ka long, ba ha shwa ka elekshon MLA 2023, ka parti ka la beh seng noh ia ki san ngut ki MLA jong ka ba ki leit ban kyrshan ia ka sorkar ba ialam da ka parti NPP namar ki iatreilang bad ka BJP, hynrei mynta ka Congress ka iatreilang bad ka NPP, katba ka NPP pat ka dang ia treilang bad ka BJP bad kumta, ula ong “Ngim dei ban thaw kyndon bad pynkheiñ hi noh ia ki tei ki kyndon”.
Sa kawei pat ka mat ba u bah Nonglong, u la pynpaw ha ka shithi resaiñ ka jong u, ka long ba san ngut ki MLA hapoh ïingdorbar thawaiñ jong ka jylla ki don ha ka liang pyrshah ia ka NPP, katba sa ngut ki MDC kiba don ha KHADC pat ki kyrshan ia ka NPP, lai ngut na kine ki MDC ki dei ruh ki MLA ha kajuh ka por bad kumta, ula ong “Kumno kin kohnguh bad pyrshah ruh ha ka juh ka por?” kane ka dei ka bymlah satia ban pdiang, la thoh u bah Goldenstar Nonglong ha ka shithi sha u President jong ka MPCC.
ka Jingpyrshang u Dr Mukul Sangma ban pynduh pyndam ia ka jingbam armaloi ki juh ki briew ban long MDC bad long MLA,,ka dei ka Jingpyrshang kaba dei eh..kiba long MDC bad long MLA u juh u briew ki dei lypa tang ki khwan myntoi shimet eh….