Shillong:U MLA ka Congress na Gambegre uba dei ruh u Chief Whip ka Liang pyrshah, u Saleng A Sangma u la kyntu ia ka Sorkar ba kan tuklar mardor halor ka jingkiew dor palat jong ki mar ki mata ha ka Jylla.
“Wat kiba riew spah ki ud ia ka jingkiew dor ki marbam mardih bad dang ha kine ki sngi, shi song u khaw, haduh T.1500 u khaw hynrei dang hynnin ka sngi la kiew sha ka 1800 haduh T. 2000 shi song (50kg)”, la ong u Saleng.
Kane kan ktah jur ia kiba duk ba kin thied ia ki marbam ba kongsan ki bym long satia ban ieh. “Kaei kaban jia ia kiba duk, ki hap ban siew ia ka bai ïing, ia ka bai skul ki khun, kine ki dei ki jingeh ba ki briew ki iakynduh mynta”, la ong u Saleng.
U la ong ba ka sorkar ka dei ban tuklar ia kane namar ba ki nongkhaïi kin pynkiew bad buh dor katba ki sngew biang ialade. “Peit ha kine ki sngi, ka dor doh masi ka long T. 450 eiei hynrei mynta ka la kiew shaduh T. 800 shi kilo bad kiwei ki marbam hynrei ka jingkamai jong ki paidbah ka neh kumjuh. Nga sngew ba ka sorkar ka dei ban tuklar ia kane namar ba ktah ia kiba duk”, la ong u MLA ka Congress na Gambegre.
U Saleng u la pynpaw ka jingngewkhia ba ki paidbah ka Jylla kiba shu im sngi ha ki kam bylla ki la iakynduh jingeh na ka jingkiew dor palat ki mar ki mata, nalor kiba bun kidei kiba sah ha ki ïing wai kiba hap ban pyndap ia ka bai ïing bad kumjuh ia ka bai bam.
“Mano mano ym dei ban shim kabu na bynta ki paidbah”, u la bynrap.
Kiew dor u khaw bad kiwei ki mar bam hapoh ka jylla Meghalaya namar ba ka jur palat ka jingshalan tuh ia ki mar sha Bangladesh. La jan man ka miet ki kali bolero pickup ki transport ia ki mar sha border Bangladesh bad kane ka pynheh ia ka jingdawa ia ki mar kumta ka dor jong ki mar ka nangkiew shuhshuh ba la nang duna ki mar ha stock. Phi lah ruh ban pynshisha ia kane da kaba phi leit peit sha ki thain Lad-Rymbai shaduh Borghat bad Kwator. Hangta phin iohi iaka jingshalan mar tuh kaba la jyrsieh shaba palat namar bym don ki nongpahara (BSF) ha kito ki thain.
Ym dei tang u khaw,baroh ki mar ki la kiew for lut, hynrei ia kane ym don mano mano ruh ban peit.ki dukan ki buh dor katba mon, lada dei sha ri Thor shi tyngka Kan kiew dor baroh ki paidbah kin ia mih sha surok katba ha jylla jong ngi baroh u paidbah u iohthiah lyngngai