“Shu ong hooid ne em” halor ka ILP, ong ka KSU ia ka sorkar India

Shillong:Ka Khasi Students Union (KSU) ka la ong ba ka Sorkar Pdeng bad ka Sorkar Jylla ka dei ban ai ïa ka jubab kaba shai kdar ban ong Em ne Hooid halor ka jing dawa pyntreikam ïa ka Inner Line Permit (ILP) hapoh ka jylla.

Ïa katei la ong da u President ka KSU u Samla Lambokstar well Marngar haba ai jingkren ha ka jingpyn skhem ïa ki Nongïalam ka KSU Central Executive Council (CEC) kaba la long ha Jaïaw.
U samla Lam bokstarwell ula ong, ba ka jinglong jingman jong ka jingdawa ILP ha ka jylla mynta ka long ba ka Sorkar Jylla ka la mynjur da ka Resolution hapoh ka ïing dorbar thawaiñ bad ka la phah ïa katei ka Resolution sha ka Sorkar Pdeng hynrei haduh mynta, ka Sorkar Jylla kam tip, la ka Sorkar Pdeng kan mynjur ne kan kyntait ïa ka jingdawa pyntreikam ïa ka ILP hapoh ka jylla Meghalaya.

“Ki nongïalam ba synshar ïa ka Sorkar Jylla kila pynpaw ba ki ïai buddien ïa kane ka jingdawa ILP bad ka jingkylli ka mih mynta, sa katno snem ngin ïai buddien, sa katno snem ngin ïai ap. Ka kyrwoh kaba shai sha ka Sorkar Jylla bad ka Sorkar Pdeng ka long ba dei ban kren shai, Hoid ne EM halor ka ILP khnang ba ki paidbah ka jylla ruh kin sngewthuh kumno ban ïaid shakhmat,” ong u Lambokstarwell Marngar.

Ula ong, katba ka seng bad ki paidbah ka jylla ki dang ap ïa ap ïa jubab Hoid ne Em, na ka liang ka seng kan ïai buddien ïa kane ka jingdawa, la kadei ban ïa mih surok ruh, ka seng kam banse ban pynthikna, kaei ka jingpyrkhat jong ka Sorkar Jylla bad Sorkar Pdeng haba ïadei bad ka jingdawa ILP hapoh ka jylla.

U President ka KSU ula ong, kumba ïohi mynta ka jingrai jong ka sorkar jylla ban mynjur da ka Resolution hapoh ka ïing dorbar thaw aiñ ha ka 19 tarik u Nohprah 2019 ïa ka ILP kadei tang ka jingtheh umpjah ïa ka jingkhihwin ki paidbah namar haduh mynta, wat ki bor Sorkar Jylla kim tip shaei ka lawei ka ILP.

“Ka seng ha ki sngi ban wan kan ïai bteng ïa ki prokram ban dawa na ka sorkar jylla ban leit tied jingkhang shaduh ka nongbah Delhi ban ïoh ka jubab kaba shai halor ka jingdawa pyntreikam ILP hapoh Meghalaya,” ong u President ka KSU.