U PYNIM BAD U KHOT

Dr. B.R. Marpna

Ka jingpynim ka dei ka jingangnud ka jong U Blei ban pynim ia ngi ki briew namar ba ngi la sakma na U Blei bad lyndet na U. U Blei Um kwah ba kawei ruh ka mynsiem kan jot noh hynrei ba baroh ba kin poi sha ka jingkylla kaba mut da kaba pdiang ia U Jisu Khrist ha ka jingim jong ki khnang ba kin ioh biang ia ka hok jong U Blei bad ban don biang ka jingiadei sa shisien pat. Ka Bible ka kren shai ba baroh ngi la leh pop bad ngi la duh noh lehnohei ia ka burom ka jong U Blei, kaei ka daw kaba la pynlong kumne? Ka dei ka pop bad ka jingtim ka wan bad kumta donkam ban pynbha pat (restore) ia kaei kaba ngi la duh noh.

Dei na kata ka daw ba U Jisu U hap ban wan sha kane ka pyrthei ban kup ia ka jinglong briew bad ban khot ia ki briew sha ka jingkylla kaba mut khnang ban ioh ban pynlait na ki jingshahteh shahkhum ha ki bor jong U Soitan bad ki bor jong ka jingdum. U Jisu U wan ban pynim, pynkhiah bad pyllait. U khot ia ngi ki nongbud hadien ba U la kiew noh sha bneng ban leit sha ka pyrthei ban ialap ia ka Gospel jong ka jingkyrmen sha ki bynriew baroh bad ban iaid bud ia kane ka Mission. Haba U pynim, U khot ruh ia ngi sha kane ka jingkhot khnang ban pyndep ia ka jingthmu jong U Blei.

U Blei U long Uba khuid bad U khot ruh ia ngi sha ka jingkhuid. Ka jingkhuid kam dei na ki jingleh ne ki jinglah hynrei ka dei tang da ka jingaiei bad ka jingisynei Blei. Ki hok jong ngi ki long ki syrdep jot hakhmat jong U Blei. Ki jingleh jong ngi kim lah ban pynpoi ia ngi sha Bneng hynrei da ka jingngeit jong ngi ha U Jisu Khrist bad da ka snam jong U kaba pynkhuid ia ngi na ki pop baroh. Haba U Blei U khot ia ngi, ka don ryngkat bad ka jingthmu ban long jingkyrkhu sha kiwei pat.

Ka jingkylli ba nga buh hangne:

Hato U Blei U la pynim ia ngi?

Hato U Blei U la khot ia ngi?

Hato ki hok jong ngi, ki lah mo ban pynim?

Haba U la khot, ngi la pyndep mo ia ka jingthmu jong U Blei?

Hato ngin leh kai mo ia ka jingaiei Blei?

Hato phi sngew ba la dier por ia phi?

Ka jubab ka long: Ka por ka dang don

“Uba la pynim ia ngi, bad Uba la khot ia ngi da ka jingkhot Bakhuid, ym katba kum ki jingleh jong ngi, hynrei katba kum ka jingthmu bad ka jingaiei jong U hi, ia kaba la ai ha ngi ha U Khrist Jisu mynshuwa ki ia bymjukut” 2 Timothi 1:9.