Ki nongialam jong ka HYC, West Khasi hills, ki la leh ia kaba bha tam, da kaba ki leit ujor, halor ka jingthung kam da ki dkhar sha ki shnong bapher, ka West Khasi hills, tang na ka bynta ban sam shithi ruh, lane ba ki khot ki Gramin Dak Sevak, kiba trei ha Byrki, Jaidoh, Mawlieh, Nongtyn niaw, Nongkasen, Shyrkon.
Kaba lyngngoh pat, ka long ba kito ki nong iakhih bhah kam bhah jam lane reservation, ba ki ioh thiah lyngngai halor kane ka mat bad ki sngap mynthi pynban lane ha kawei ka mat, ka long, ba lada thung kam U Conrad ia ki Garo, kin ia khluid tar ka janor, katba lada wan rah U Modi, da ki dkhar sha kitei ki nongkyndong tam, kim sngew wit eiei ruh em bad katei ka dei ka jinglong arsap, kaba la palat liam artad.
Ka sorkar India, ha kine ki sngi, ka leh katba mon, namar ba ki riewieid reservation, ki peit matdong, tang ia U Conrad lane ia ki Garo; hynrei ki kotkhubor, ki thoh, ba dang khyndiat taiew, ki Manipur, ki la wan rung trei ha ka Agricultural University ha Kyrdemkulai; hynrei hangtei ruh, dei tang ka KSU, kaba tuklar ia katei ka kam bad kam dei tang kata, ki don shibun bah ki kam jong ka sorkar India, lada dei ki kam sam shithi, ki kam shipai kiba rit kyrdan, ki kam bapher ha ki tnat jong ka sorkar India, ngi iohi, ba ki samla jongngi, ki kutlad, namar ba ym don mano mano ba iarap lem.
Ngi iohi ruh, ba ka jing ioh bat bar jylla, ka la jubor haduh katta katta, ha ka surok bah Shillong Guwahati bad kitei kin wan leh aiu, lada kim don lypa, ia ka jing iateh ban leit trei ha ki kompeni shna mobile, ki kompeni shna surok, ki kompeni shna iing shna sem bad hangtei ruh, ym don mano mano ba tuklar bad kumta ka jingkhynra ha surok bah, kam don jingmut eiei ruh em, namar ba u dkhar uba kwah kam, lada um lait na surok heh, un iaid na surok rit bad lada um lait da ka kali, un iaid da ka kjat, tang ban poi sha ka jaka trei lajong.
Ki riew ieid reservation, ki la dei ban kylla thiah kylla dem ialade, namar ba kane ka mat, kam dei tang ban ia shut reng ia U Conrad Sangma, lane ia ki Garo; hynrei, kaba kongsan eh, ka dei ia ka sorkar India, namar haduh mynta, ngi shu ai ei da ki lak akar ki jaka jongngi ban shna ia ki ophis bapher, katba u trai jaka pat, u shu peit jawdud, ba kin wan kit kiba nabar, ia la ki khun ki tnga, ia la ki shakri shakor, haba ki wan trei sha ki ophis sorkar India.
U Rupang lada phi dei u nongthoh khubor bashisha phim dei ban shah liang bad kynthoh iano iano. Long pdeng kein, kum kine ki jaid journalism jong phi kam dei ka true journalism. Ai beit ia ka khubor ba dei ban ai, ki mat ba dei ban kren bad wat condem iano iano. Ai ki nongpule kin bishar bad pyrkhat kumno ki sngew halor ki khubor bad ki mat ba phi wanrah.