![](https://www.urupang.com/wp-content/uploads/2023/06/DSC00677-24.jpg)
Shillong:U MDC ka Congress na Mawhati u bah Charles Marngar, u la ong ba ka jingleit iatreilang ka Congress bad ka NPP ha Khasi Hills Autonomous District Council (KHADC) ka long ban pynurlong ia ki jingdawa hadien ba u la shong ha ka liangpyrshah bun snem ki khlem urlong satia.
“Ka jinglong MDC jong nga, ka la long saw snem tam eiei bad sa tang 8 bnai eiei ka la kut ka jinglong MDC bad ka jinglong MDC jong nga ha kine ki saw snem eiei, ki paidbah kila sakhi iaka jingkren jong nga ia ki mat ha dorbar khamtam halor u pud u sam”, la ong u Charles.
Hynrei kaba sngew bynniaw ka long ba bunsien ka bun ka por kaba u mad ia ka jingsngewsih ia u namar ba ki mat ba u kren ha dorbar kim ju long kam. “La bunsien nga wanrah ia ka mat jingpynbeit pud jingiapynbeit sam ha ka dorbar, hynrei tang kawei ka long nga kwah ban pynkynmaw ba watla bunsien nga wanrah, hynrei don ka por ba nga sngew diaw bad kaba kmen hynrei kaba kham bun ka dei ka jingsngew diaw. Ka don ka jingshisha ba la kular ia nga hapoh dorbar bunsien da ki nongialam ha ka dorbar badonburom jong ngi, ban wan ban jngoh ia u pud u sam, ia ki nongshong shnong jong ngi kiba don hapoh khappud hynrei ka long kaei kaei kaba sngewsih ba ha kine ki saw snem shiteng, ym don iwei ruh ba wan jngoh”, la ong u Deputy Chairman ka Council. U la ong ba um kwah ban kdew kti iano iano hynrei ki jingkular ki khlem urlong. “Dei halor kane ka nongrim ba nga la rai ban don noh ha ka liangsynshar, watla ka don sa 8 bnai, bad ha kine ki 6 bnai, ngan ioh ban iakren ia u CEM, ia ka EC ba ka dei ban shim khia ia kane ka kam. Bad naduh ka sngi ba nyngkong, u CEM bah Pyniaid Sing Syiem u la kular ba hadien ar taiew, yn leit jngoh ia ki paidbah bad u pud u sam ha khappud”, la bynrap u bah Charles.
U bah Charles u la ong ba lada un shongthait kum u MDC ynda la wan ka jingpynkylla ia ka Sixth Schedule, lehse kan ym shah shuh ban iakhun MLA bad MDC bad kan pynsahnud ia u bym lah ban leh eiei kum u MDC, bad dei ruh halor kane ka nongrim ula rai ban don ha ka liangsynshar.
Phi don ban ong eiei?