DA PYNSHONGNIA

P.B.S

[ba bteng] “Phi ioh shisha ban kren ki kyntien kiba dei sbiak khlem jingbakla shuh. Imat dei shisha kumba ong maphi ba sa long kumne ruh. Kane ka paw tyngkrein ha kiba bun bah ki khun samla jong ngi. Lada ki samla ki long kumne, mutdur sa ki khun jong ki lei tip ka ban long kumno shuh” ong ka paralok
“Ka nuksa ki kmie ki kpa, ka nuksa ki samla ka phalang lypa la kaba bha ne kaba sniew. Dei hangne ba ka shong synjor ka imlang ka sahlang lada kaba sniew ka khlain. Lada iai kren kin mih shi mih bad kaba shongnia tam ka dei kumno yn saindur ia ka ban sa wan lada ym lah pynshongnia hangta khlempep ka jingdukha bad jingsohsat kan pynkynting mawria ia ka jingim ba kordor” ong ka paralok.

“Kumba da thew phi kren. Ka dei palat” ai jingiaroh ka kmie u samla
“To kata ngan leit noh shwa ho” ong ka paralok bad ka mih noh artat
Ka aiom synrai ka la leit bad la wan sa ka aiom tlang. Kane ka aiom ka dei kaba bun bha ki jingsgewbha. Ki briew kiba don baem ki la da pynmang lypa ban thied kane katai lane ban pynitynnad ia ka iing ka sem. La kiba bun ki paramarjan ki wan pynshngain bad kren ai mynsiem ia kane ka longkmie hynrei ha la marwei ka pait ka dohnud namar ki jingeh kiba ka mad bad ba ban sa ka jingduk. Kane ka kmie jong u khun tamsneng ka ju buh jingkylli ba lano un lait noh na along. Ki rangbah na ka balang ba ka don ki ju wan iasyllok bad ka man ka por. Ka tngen ka mynsiem bad kam ju klet ban phah duwai kyrpang ha kita ki khmat balang.

“To kong wat nym sngewsih than ka por kan sa poi ba un lait” la pyntngen u nongkitkam balang ba la kham tymmen
“Tang ia kata hi kein ba nga kwah bad angnud eh” la ong ka menkmie
“Phi tip kong ma ngi ki nongialam balang ngi khia ki jingmut jingpyrkhat ia ka jingroi bad ka jingkiew stet kum une u jait jingdih ba shyrkhei ha ka imlang ka sahlang jong ngi. Ym tip shuh ba balei ki leit liat haba la tip pyllein pyllein ba u dei uba shyrkhei haduh katta katta ruh” ong uwei u nongialam uba kham samla rangbah
“Don haei ka jinglait bad don haei ka jingtam ha ka jinghikai ym tip shuh” ong ka longkmie
“Ha man la ki jingiaseng sngi u Blei la ka dei ka Sunday School ne jingiaseng paidbah ki nongkren ki kren beit ia ka jingshisha katkum ka ktien u Blei” pynphai ktien u rangbah ba la kham metiaw
“Tangba mynta, nga la ioh jingtip ba bun bah ki briew kiba lapmiet eh ha ki social media, naduh ki hep barit, ba dang khie samla, samla, ki rangbah wat kiba la noh ka rta ruh ki don hi katto katne” la ban ktien biang uba kham dang samla.

“Hooid, ka dei kein phi” mynjur ka longkmie
“Mynta ha jingiaseng da slem shi kynta shiteng ne ar kynta duh ki la ai signal da kaba saham leh sya, ki jyrhoh hynrei ha la pneh ka social media ki lah ban shong da ki bun bun kynta. Tip ka bor aiu sha kum kane?” kren bynniaw uba la kham tymmen
“Ka jingiamareh thong ki briew ban thied mobai ‘touch screen’ la ima shisha wat kita kiba kam Khristan ruh” dain phalup tyngeh uba kham tymmen
“Haba kren ia ka jingshisha mynta ym ithuh shuh uei u Khristan bad uei u bym pat long Khristan namar i kumba ki ia tyllun lang hajuh. Imat dei nangne ba kharoi ka jingsniew namar na kane ka social media ki tip buit ki tip rukom khamtam eh ia kaba sniew. Toi, ka jingbha ruh ka don, hynrei bun kiba tuid sha ki bym tei ia ka jinglong jingim babha. Da bishar sani bha phin lap ba ki nong view (nongpeit) ki duna bha lada dei ia ka ban saindur ia kaba bha hynrei ia kaba ym iahap dur ki nongpeit wow haduh lak? Ka phalang aiu kane? Ka jingsniew ka jingsniew ka la kah syrngiew bad iuh ia kaba bha” niew tang uba kham rangbah.

“Da pynshongnia ia kine kiei kiei ka lam sheptieng ioh ba ka jinghikai babha kam rung shuh bad hangta yn sa jyllei da ki kam bymman suda kiba pynkthang naduh iing haduh bar. Nga nga sngew ba la dei ka por ba ka Balang kan nym shong kli ban iai pynsngewthuh ia ka jingktah ka social media” la ban ktien biang uba dang kham samla
“Ka dei. To ngin ia dihsha shwa” ong ka kmie u tamsneng.

Hadien ba la dep dihsha ki khmat Balang ki dang bteng ka jingiakren shaphang ka jingktah bad ka bor ki social media. Ki kren da ka jingsngewkhia ba ki Khristan mynta ki lip rong noh ha ka jingshah tyllep noh ha ka bor ka social media. Ki kren artatien ruh ba imat kiba pule Bible ki don sa khyndiat eh namar ki tang shu lait kti lait kjat ki da kloi noh ban kner la ka mobai ban peit ia la ki jingkwah jong ki. Ki da kren khia ba lada ka ktien u Blei kam don jaka shuh ha dohnud ki Khristan bad ia ka dohnud ba thylli jong ki yn pyndap noh da kiwei pat ki jinghikai kiba u Blei um sngewbha. Lada lah poi haduh uta u pud ki briew kim sngewthuh shuh ialade bad ki kloi ban leh kano kano ka kam kaba long pyrshah ia ka imlang sahlang. Dei hangne kein ba ka imlang sahlang la byrsieh da kiei kiei ki bym sngewtynnad kiba mih na ka dohnud ba pyut jong ki briew kiba long pynban ki atiar u bymman.
“Kong shuwa ba ngin leit noh, ngin pynlong jingduwai shuwa mo” la ong uba rangbah tam
“Hooid, dei kata kaba nga da kwah eh” ong ka longkmie [yn dang bteng]