La pyllait palat T. 2.42 lak klur, sha 11 klur ngut ki nongrep

Shillong:Ka Pradhan Mantri Kisan Samman Nidhi (PM-KISAN) ka dei ka skhim Sorkar Pdeng ha kaba ka jingpynbiang pisa ka long 100% na ka Sor kar India. Hapoh kane ka skhim, ka jing ai jingkyrshan kaba T. 6,000 ha ka shi snem ha ka rukom ai jing siew kaba lai bynta ka dei kaba la pyn biang ia baroh ki longiing nongrep kiba don la ka jong ka jaka bad kane ka ai jing shngain ia ki ha ka ioh ka kot bad ka imlang sahlang. Ia kane ka pisa la phah sha ki bank account jong kito kiba dei ban ioh jingmyntoi khlem da don mano mano ba mushlia, bad namar kane ka long kawei na ki skhim Direct Benefit Transfer (DBT) ba heh tam ha ka pyrthei.

Haduh mynta, palat T. 2.42 lak klur ka dei kaba la pynbiang ia palat 11 klur ngut ki nongrep. Shuh shuh, la pynpoi T. 1.86 lak klur naduh ka jingpakhang dam namar ka khlam Covid-19. Lah ban shu kdew hangne ba palat T. 57,628 klur ka dei kaba la ioh da 3 klur ngut ki nongioh jingmyntoi kiba long ki longkmie, bad kane ka pyni ia ka jingmyntoi ba kane ka skhim ka ai ha ka jingpynkupbor ia ki longkmie.

Katkum ka jingwadbniah da ka International Food Policy Research Institute (IFPRI), ka PM-KISAN ka la wanrah shibun ki jingmyntoi ia ki nongrep bad ki kam rep. Ka la pynbeit ia ka jingduna pisa ki longiing jong ki nongrep bad kane ka la plie lad ia ka jingthied ia ki tiar ba ki donkam. Kane ka skhim ka kyntiew ia ka jingpdiang ia ki rukom rep kiba katkum ka juk mynta lyngba ki Krishi Vigyan Kendra. Ka jingphah pisa sha ki nongrep ka kyntiew ia ka ioh ka kot jong ki bad ka kyntiew ruh ia ka jinglah jong ki ban iaid shaphrang khlem ka jingartatien bad kane ka ialam sha ki jingbei tyngka kiba wanrah jingmyntoi.

Ka PM-KISAN ka la pynkupbor ia ki Annadata (nongrep) da kaba kyntiew ia ka jingbei tyngka ha ki kam rep, ka jingpynbeit ia ka jingduna pisa bad ka jingkyntiew ia ka ioh ka kot ha ki jaka nongkyndong. Kumta, ki nongrep ki la ioh lad ban bei tyngka ha ki jaka rep jong ki da kaba thied ia ki symbai, ki dawai sboh bad ki tiar ba ki donkam bad kane ka kyntiew ia ki jingmih jong ki mar rep.