Ba duna kiba shim bynta, pynsangeh jied Rangbah shnong

Nongpoh:Ka jingthmu jong ka shnong Borbhuin ban jied Rangbah shnong bad ban pynthymmai noh ia baroh ki nongialam shnong, kaba la thmu ban pynlong mynsngi saitjain, ka la pulom noh bad kata ka dei hadien ba bun na ki nong shong shnong kim wan ban iashimbynta ha katei ka jingiajied nongkitkam shnong.

Ha katei ka sngi ba ka shnong Borbhuin Byrnihat, ka la thmu ban thmu ban pynthymmai ia ki nongialam shnong, ka dei ruh hadien ka jing khlad noh u Rangbah shnong ha u snem ba la dep.

Lah ruh ban kdew hangne, ba naduh ka jingkhlad u rangbah shnong ba rim, ia ki kam shnong kam thaw la pyniaid da u Acting rangbah shnong bad dei halor kata ka nongrim ba na ka liang ka ophis ka Hima Mylliem, ka la bthah ia ka ophis u Syiem ka Raid Marwet, ba ki dei ban pynlong noh ia ka jingpynthymmai ia ki nongialam shnong hapoh katei ka shnong.

Haba iadei bad katei ka jingpynsangeh noh ia katei ka jingjied nongialam shnong, u Ken Syiem, Syiem ka Raid Marwet, u la ong ba katei ka jingthmu ban jied thymmai ia ki nongialam shnong, ka dei katkum ka jingbthah na ka ophis u Syiem ka Hima Mylliem, hynrei haba ka shnong ka la phah ia ka jingthoh na katei ka shnong ba kin pynsangeh noh ia katei ka jingjied nongialam shnong bad ruh ba duna ki paidbah kiba wan ban iashimbynta, kaba la pynlong ia ka ophis u Syiem ka Raid Marwet ban pynsangeh noh bad ba ki la rai ba kin sa pynlong noh ha kawei pat ka sngi.