Risaiñ U bah HDR Lyngdoh na ka kam MDC

Shillong, 23 Nailur:
U bah HDR Lyngdoh u la phah ia ka shithi risaiñ na ka kam MDC mynta ka sngi sha u Chairman ka KHADC u bah Mansturdy Nongrem, u bah HDR um shym la wan ban aiti dalade hi ia ka shithi risaiñ hynrei u la phah da u Personal Secretary jong u ban leit ai sha u Chairman ka KHADC.
Ha ka jingiakren bad ki nongthohkhubor mynta ka sngi hadien ba la oh pdiang ia ka shithi risaiñ u Chairman ka KHADC u bah Mansturdy Nongrem u la ong ba um pat pdiang ia katei ka shithi risaiñ jong u bah HDR Lyngdoh bad un dang hap ban peit sani bha bad hadien ba la dep peit sani bha u la ong ba un shim ia ka rai la un mynjur ne –em bad hadien ba la mynjur, u la ong ba un hap ban phah sha u Lat ka jylla.
Hynrei katkum ki tyllong khubor ba la ioh lum pat la iathuh ba katei ka jingphah shithi risaiñ jong u bah HDR ka long tang ban pyndep ia ka kamram kaba u la dep kren sha ki nongthohkhubor mynhynnin ka sngi, hynrei u la phah la ka phah sha ka shithi risaiñ sha u Chairman, hynrei ha kajuh ka por un ap pat ia ka khubor ka ban mih na ka jingiatai hapoh ïng Dorbar lashai ka sngi ka 24 tarik u nailur bad lada jia ba ka ïng Dorbar kan ym lah ban pass ia ka Bill kaba la wanrah da ka liang synshar katei ka shithi risaiñ jong u kan iap noh bad u Chairman un pynmih ia ka rai ba un ym pdiang hynrei lada jia ba ka ïng dorbar kan pass ia katei ka rai, ka lah ban mih na rai na u Chairman ba un phah noh sha u Lat ka jylla ia katei ka jingtip ba la risaiñ bah HDR Lyngdoh.
Lah ban pynkynmaw ba shisngi shuwa ban phah ia katei ka shithi risaiñ u bah HDR Lyngdoh u la dep pynbna sha ki lad khubor ba ma u kum u myntri ba bat ia ka District Council Affairs u kloi ban lamkhmat ia ka rai ban risaiñ noh kum u MDC ban pynpaw ia ka jingbym sngew iahap ia ka jingbat kam ar maloi ki nongmihkhmat paidbah.