“Husiar ioh ngat ha shrip” ong u para, U bah Cherish; wat la u kyrshan ia ka jingiakren iasuk ka HNLC

Shillong:U para trai jong u bah Cherishterfiled Thangkhiew, u bah Granary Starfield Thangkhiew, mynta ka sngi u la kyrshan ia ka jingiakren iasuk ka seng Hynniewtrep National Liberation Council (HNLC) tang ba ki dei ban husiar ioh ngat ha ka shrip.

Haba kren mynta ka sngi, u bah Granary u la ong ba u hymen jong u ruh, u bah Cherishterfield uba dei u General secretary barim ka HNLC, u la don bynta ha kane ka jingiakren iasuk la bun bnai hynrei kaba donkam ka long ba ki dei ban husiar ioh kan jia pynban kumba jia ia u namar ki khot da ka mon, ki dung da ka diang.

“Halor ka jingiakren iasuk ka HNLC, ngim don eiei ban pyrshah, namar ha kane ka kam iakren iasuk wat u hymmen jong nga (bah Cherishterfield) u don bynta hangto da ki bnai, ngi tip ia kata. Hynrei ki dei ban husiar ioh kan jia kumba jia ia u hymmen jong nga, namar shu buh mynta ki khot da ka mon, kin dung da ka diang, kam iahap kein”, la ong u bah Granary.

Lah ban kdew ba u bah Cherishterfield u la shah siat iap ha ing jong u ha ki pulit ha ka 14 tarik Nailar 2021 ha ka por ba ki leit ban khynra ban kem ia u.
Ha kajuh ka por, u bah Granary u la ong ba kila ujor sha ka kashari High Court, Meghalaya halor ki lai tylli ki daw hadien ba uba ha iing jongki, u la shah siat iap ha ki pulit ka Meghalaya ha u Nailar 2021.
U bah Granary u la ong ba ki lai tylli ki daw ki long ban tip ia ka sienjam ba ka sorkar ka la leh halor ka ejahar ba la ujor kiba haïing, nangta kiei ki sienjam ba la leh katkum ka kaiphod ka Commission kaba la tohkit halor jingshah siat iap u bah Cherishterfield bad kawei pat ka long ban aiti noh sha ka Central Bureau of Investigation (CBI) namar ba kim hun ia kane ka jingleh ka sorkar.

“Ngi la ujor ha High Court, ka long kiei ba phi (sorkar) la leh halor ka ejahar ba ngi la ujor ha ka 18 tarik Nailar 2021, bad kaba ar, ka jingtohkit ka One Man Inquiry Commission, kaei ba phi la leh halor ka jingai jingmut ka Commission bad kaba lai, ngi dawa da ka jingtohkit ka CBI namar ba ngim hun ia ka jingleh ka sorkar”, la ong u bah Granary.