“Ym pynrung deficit ia ki skul”

Shillong, 23 Nailur:
U Symbud Myntri Rangbah ka jylla u Dr Roytre C Laloo u la ong ba ka sorkar kam pat don ka jingthmu ban pynrung deficit shuh ia ki skul bym dei sorkar ha ka jylla bad ka daw, ka dei namar ba ka hiran pisa palat.
Haba jubab ia ka jingkylli ba la wanrah da u MLA ka Mawthad raishan Bah H Brolding Nongsiej hapoh ka iing dorbar mynta ka sngi, u Dr Laloo u la ong ba ia mynta ka sorkar ka dang pynleit jingmut ban pynbha ban pynbiang shwa ia ki deficit skul kiba la dep shimti ka sorkar bad hadien ba la lah ban pynbiang ia ki jingdon kam jongka, ka sorkar kan sa pyrkhat halor kane.
U Dr Laloo u la ong ba ia ki nonghikai deficit, ia ki nonghikai skul la siew da ka tulop katkum ka jingsiew ia ki nongtrei sorkar.
“Ki don 121 tylli ki secondary school bad 17 tylli ki higher higher secondary school kiba hap ha ka deficit ha ka jylla”, la ong u Dr Laloo bad bynrap ba ia ki skul Secondary la pynrung deficit khadduh ha u snem 1995 katba ia ki higher secondary school la pynrung deficit ha u snem 2005.
Nalor kine, ki don ruh sa 2296 tylli ki skul ba shu ai grant ka sorkar ki bym pynrung ha ka deficit ha ka jylla.